Ózbekstan «Adolat» SDP hám bir qatar shólkemler menen birgelikte «Biz zorlıqqa qarsımız!» temasında dógerek sáwbeti bolıp ótti.

Onda hayal-qızlardıń jámiyette óz ornın tabıwı, jámiyetlik siyasiy belsendiligin arttırıw menen birge basım hám zorlıqtan saqlaw boyınsha elimizde alıp barılıp atırǵan sistemalı jumıslar, partiyanıń bul baǵdardaǵı ámeliy usınısları hám baslamaları haqqında sóz boldı.
Atap ótilgenindey, partiya hayal-qızlardıń huqıqların qorǵaw jolındaǵı áhmiyetli usınıslardı alǵa qoyıp, kólemli jumıslardı ámelge asırıp kelmekte. Atap aytqanda, partiyanıń “Bir adolatshı” – júz hayaldı qorǵawshı” joybarı sheńberinde hayal-qızlardıń jámiyette óz ornın tabıwına járdemlespekte. Ásirese, olardı basım hám zorlıqlardan saqlaw, mashqala hám usınıslardı úyreniw jáne sheshiw, densawlıǵın bekkemlew, jámiyetlik-siyasiy belsendiligin arttırıw máselelerine ayrıqsha itibar qaratıladı. Sonday-aq, hayal-qızlardıń siyasiy-huqıqıy bilimlerin arttırıwǵa qaratılǵan bir qatar joybarlar turmısqa engizilip kelinbekte.
Ilajda “Hayal-qızlardı basım hám zorlıqtan qorǵaw haqqında”ǵı Ózbekstan Respublikası nızamı, Ózbekstan Respublikası Prezidentiniń 2024-jıl 10-maydaǵı “Basım hám zorlıqtan jábirlengen adamlarǵa sociallıq xızmetler kórsetiwdi jetilistiriw boyınsha ilajlar haqqında”ǵı qararı hám basqa da normativlik-huqıqıy hújjetlerdiń orınlanıwın támiyinlew boyınsha alıp barılıp atırǵan jumıslar haqqında da maǵlıwmat berildi.

Ilajda Ishki isler ministrligi hám Ózbekstan Respublikası Shańaraq hám hayal-qızlar komitetiniń wákilleri de shıǵıp sóylep, hayal-qızlarǵa zorlıqtıń aldın alıw, olarǵa qorǵaw orderin beriw baǵdarında ámelge asırılıp atırǵan jumıslar boyınsha maǵlıwmat berdi.

Atap ótilgenindey, ishki isler uyımları menen birgelikte zorlıq jaǵdaylardı erte anıqlaw hám operativ ilaj kóriw sisteması, hayal-qızlar ushın arnawlı qorǵaw orayları, “Isenim telefonları” hám 24/7 sistemasında isleytuǵın járdem platformaları keńeytilmekte. Sonday-aq, zorlıqqa qarsı psixologiyalıq bilimlendiriw hám másláhát xızmetlerin keńeytiw, jaslar ushın qáwipsiz qatnasıqlar hám stresske shıdamlılıq boyınsha treningler ótkeriw zárúrligi atap ótildi.

Muhtarama KOMILOVA,
ÓzAnıń xabarshısı