Prezident Shavkat Mirziyoev 26-mart kúni energiya resursların únemlew, tutınıw nátiyjeliligin arttırıw hám olardan aqılǵa uǵras paydalanıw ilajları boyınsha májilis ótkerdi.

Energiya resurslarınıń eń kóp jumsalıwı, bárinen burın, ekonomika tarmaqlarına tuwra keledi. Eski dáwirlerde qurılǵan zavodlar ekologiya hám energiya nátiyjelilik talaplarına juwap bermegen. Jıllar dawamında modernizaciyaǵa jetkilikli itibar berilmegen. Ayırım orınlarda elektr hám gaz kúnlep bolmaǵan. Sanaat kárxanalarında tutınıwlar hám shıǵınlar kóp bolǵan.
Sonlıqtan keyingi jıllarda ekonomika tarawları energiya nátiyjelilik tárepinen jańalanbaqta. Iri kárxanalar hám energetika tarmaqları kesiminde óz aldına baǵdarlama ámelge asırılmaqta.
2030-jılǵa barıp, elimiz xalqı 41 millionǵa jetetuǵını, ekonomika 2 esege ósiwi kútilmekte. Bul energiya resurslarına bolǵan talaptı házirgiden 1,5 esege arttıradı. Sonlıqtan jańa joybarlardı iske qosıp, quwatlılıqtı kóbeytiw menen birge energiyanı únemlew ilajların kóriw zárúr.
Májiliste juwapkerler bul baǵdardaǵı jumıslar hám aldaǵı rejeler haqqında málimleme berdi.
Prezidentimizdiń kórsetpesine muwapıq, ótken jılǵı tájiriybeni dawam ettirip, orınlarda energiyanı únemlew imkaniyatları ilimpazlardıń qatnasıwında ilimiy tiykarda úyrenilmekte. Atap aytqanda, Samarqand, Sırdárya hám Jizzaqtaǵı úyreniwlerde 870 million kilovatt saat elektr hám 420 million kub metr gazdi únemlewdiń jańa imkaniyatları anıqlandı. Máselen, bul wálayatlardaǵı kishi hám orta sanaat kárxanalarında 35 mıńǵa shamalas gónergen úskenelerdi únemlisine almastırıp, jılına 385 million kilovatt saat elektr hám 50 million kub metr gaz únemlew múmkin.
Rayon hám máhállerde energiyanı únemlew boyınsha imkaniyatlar oǵada kóp. Máselen, 300 máhállede 100megavattlı kishi quyash stanciyaların qurıp, usı jıldıń ózinde 45 million kub metr gaz únemlese boladı. Bunnan tısqarı, kanal hám saylarda qurılatuǵın mıńnan aslam mikro GESlerdiń esabınan qosımsha 175 million kilovatt saat elektr islep shıǵarıladı.
Kóshelerdi jaqtılandırıwǵa da jılına 200 million kilovatt elektr jumsalıp atır. Quyash panelli shıraqlar ornatılsa, tutınıw eki esege azayadı.
Usınday imkaniyalardıń esabınan, bıyıl 1,1 milliard kub metr tábiyǵıy gaz hám 2,6 milliard kilovatt saat elektrdi únemlew boyınsha qosımsha reje islendi.
Mámleketimiz basshısı, birinshi gezekte, iri sanaat kárxanalarında zamanagóy únemli úskeneler ornatıw, energiyanıń ısırap bolıwın azaytıw zárúrligin atap ótti. Húkimetke bul tarawda jańasha orınlaw hám qadaǵalaw sistemasında islew tapsırıldı.
Mákemeler hám turaq jaylarda energiyanı únemlew mádeniyatın arttırıw da áhmiyetli. Elektr hám gazdi bosqa jaǵıp qoymaw, quyash panelleri hám basqa da alternativ dereklerden paydalanıw da biraz kólemdi únemleydi.
Ferǵana oypatlıǵı wálayatlarında xalıq tıǵız jaylasqanın esapqa alıp, olardı energiya menen támiyinlewde óz aldına qatnas islep shıǵıw wazıypası qoyıldı. Bul tájiriybe basqıshpa-basqısh basqa aymaqlarǵa da engiziletuǵını názerde tutılmaqta.

ÓzA