Shımbay rayonında jaylasqan Qaraqalpaqstan diyqanshılıq ilim-izertlew institutında «Aral teńizi regionında hawa, jer hám suw resursların innovaciyalıq basqarıw arqalı jergilikli birge islesiwshilerdiń bilimin jetilistiriw» atamasında oqıw seminarı bolıp ótti.

Seminarǵa elimizge belgili ilimpazlar, baǵmanlar hám fermer xojalıqları basshıları qatnastı.
Oqıw-seminarı dawamında Tashkent irrigaciya institutı docenti, texnika ilimleriniń kandidatı A.Karimov, Topıraqtanıw hám agroximiya ilimiy izertlew institutınıń laboratoriya baslıǵı, professor R.Kurbantaev hám Berdaq atındaǵı Qaraqalpaq mámleketlik universitetiniń oqıtıwshısı, geografiya ilimleriniń kandidatı O.Sultashovalar «Suwǵarılatuǵın jerlerdiń agrofizikalıq ózgeshelikleriniń jaǵdayı», «Shorlanǵan topıraqlardıń biologiyalıq aktivligi hám topıraqlardıń ónimdarlıǵın arttırıwdaǵı áhmiyeti» temasındaǵı bayanatları menen qatnasıp, ilaj qatnasıwshılarına keń túrde túsinikler berildi.
-Búgingi ilajda jerlerden nátiyjeli paydalanıw boyınsha qánigelerden bahalı másláhátler alıp, ózlerimizdi qızıqtırıp júrgen máseleler boyınsha keń túsinikler aldıq,-deydi Qızılózek awıl puqaralar jıyını turǵını Kárimbay Pirjanov.

Adilbay Orazov,
Qaraqalpaqstan xabar agentligi sholıwshısı.