Evropa Awqamı – Oraylıq Aziya tallaw orayları forumı sheńberinde Oraylıq Aziya xalıqaralıq institutı (OAXI) direktorı Javlon Vahobov hám Evropa qońsıshılıq keńesi (ENC) direktorı Samuel Doveri Vesterbay arasında ushırasıw bolıp ótti.

Ilajdan gózlengen tiykarǵı maqset eki izertlew mákemesiniń birge islesiwin bekkemlew, EA hám Oraylıq Aziya qatnasıqlarınıń áhmiyetli táreplerin dodalaw hám ekspert sóylesiwiniń jańa túrlerin izlewden ibarat.
Dodalaw dawamında mırza Vesterbay usı forum pikir alısıw, bilim hám aldıńǵı analitikalıq izertlewlerdi ortaqlasıw ushın turaqlı platforma sıpatında áhmiyetli ekenligin atap ótti. Tallaw orayları arasındaǵı institucionallıq baylanıstı bekkemlew regionallıq processler haqqında anıǵıraq túsinikke iye bolıwǵa járdemlesetuǵının, áhmiyetli máseleler boyınsha birgeliktegi usınıslar islep shıǵıw imkaniyatın beretuǵının atap ótti.
Tárepler tallaw túrindegi sóylesiw kólemin keńeytiw, izlenislerdi muwapıqlastırıp barıw, sherikliktiń jańa mexanizmlerin engiziw zárúrligine ayrıqsha itibar qarattı. Óz-ara izertlew joybarların ámelge asırıw, forum, seminar, dógerek sáwbetlerin shólkemlestiriwge kelisildi. Ilajlar regionlararalıq birge islesiw, turaqlı rawajlanıw, ekonomikalıq integraciya, qáwipsizlik sıyaqlı tiykarǵı baǵdarlarǵa qaratıladı.
Ushırasıw sońında OAXI hám ENC arasında birge islesiw haqqındaǵı memorandumǵa qol qoyıldı. Bul hújjet uzaq múddetli hám ekspertler arasındaǵı baylanıstı bekkemlew ushın bekkem tiykar jaratadı. Bul memorandum ámeliy baslamalardı jedel alǵa qoyıw, EA-OA qarım-qatnasın qollap-quwatlawǵa óz-ara umtılıstı sáwlelendiredi.
Hár eki tárep ekspertler dárejesindegi sheriklikti dawam ettiriw, regionlararalıq baylanıslardı tereńlestiriwge xızmet etetuǵın birgeliktegi baslamalardı ámelge asırıwǵa tayar ekenligin bildirdi. Memorandum sheńberinde rejelestirilgen ilajlar birge islesiw sheńberin keńeytiw, strategiyalıq máselelerdi sheshiwde ekspertlerdiń qatnasın keńeytiwge xızmet etedi.

Ǵ.Xonnazarov, ÓzA