Usı kúnlerde Awıl xojalıǵında bilim hám innovaciyalar milliy orayınıń direktorı Shuhrat Otajonov basshılıǵındaǵı delegaciya Qıtay Xalıq Respublikasında bolıp tur. Sapar etiw sheńberinde Ózbekstan hám Qıtay arasında awıl xojalıǵı tarawında áhmiyetli kelisimlerge qol qoyılmaqta.

Atap aytqanda, Milliy oray sistemasındaǵı Awıl xojalıǵın mexanizaciyalaw ilimiy izertlew institutı, Paxta selekciyası, tuqımgershilik hám jetistiriw agrotexnologiyaları ilimiy-izertlew institutı hám Qıtay Awıl xojalıǵı mexanizaciyası akademiyası arasında ulıwma bahası 10 million AQSh dollarına teń bolǵan kelisim dúzildi.

Atap ótiliwinshe, bul kelisim tiykarında Oraylıq Aziyada birden-bir bolǵan awıl xojalıǵı texnikaların jıynaytuǵın iri zavod shólkemlestiriw rejelestirilgen. Bul bolsa fermer hám diyqanlardı zamanagóy texnika menen támiyinlew, jergilikli óndiristi jolǵa qoyıw hám import texnikalarǵa qarap qalıwdı azaytıwǵa xızmet etedi.
Sapar dawamında delegaciyanıń aǵzaları zamanagóy shigit egiw hám paxta shiyki zatın teriw texnikaların islep shıǵaratuǵın zavodtıń jumısı menen de tanıstı.

Bul joybar Ózbekstan agrar tarawın modernizaciyalaw hám texnikalıq imkaniyatlardı keńeytiwge xızmet etedi.

Sonday-aq, sapar dawamında delegaciya bir qatar ilimiy hám bilimlendiriw mákemelerinde ushırasıwlar ótkerip, awıl xojalıǵı tarawında birge islesiwdi rawajlandırıw boyınsha sóylesiwler alıp bardı.

Sonday-aq, delegaciya aǵzaları genetik injenerler hám jańa paxta sortların jetilistiriw boyınsha alıp barılıp atırǵan izertlewler haqqında prezentaciyanı tıńladı. Ilimiy ushırasıw dawamında tárepler aldaǵı birge islesiw perspektivaların dodalap, belgili ilimpaz benen Bt genlerin Ózbekstandaǵı ǵawasha sortlarına ótkeriw hám bul baǵdarda birge islesiw boyınsha kelisip aldı.

Bul sapar etiw Ózbekstan hám Qıtay arasındaǵı awıl xojalıǵı tarawındaǵı birge islesiwdi jańa basqıshqa alıp shıǵıwı hám eki tárepleme baylanıslardı bekkemlewge xızmet etiwi kútilmekte.

Gulnaza Boboeva,
ÓzA