Korrupciyaǵa qarsı gúresiw milliy keńesi májilisinde belgilengen tiykarǵı wazıypalardıń orınlanıwın támiyinlew, sonıń ishinde, kiberkorrupciya tarawındaǵı huqıqıy tiykarlardı jetilistiriw máselesi senator hám deputatlardıń itibar orayında bolmaqta.

Usı maqsette Senattıń Jaslar, hayal-qızlar, mádeniyat hám sport máseleleri komiteti hám Nızamshılıq palatasınıń Innovaciyalıq rawajlanıw hám málimleme texnologiyaları máseleleri komitetiniń birgeliktegi májilisi shólkemlestirildi.
Májilis sheńberinde kiberkorrupciyaǵa qarsı gúresiw boyınsha milliy háreketler rejesin qamtıp alǵan birgeliktegi jol kartası hám jumısshı topar quramı tastıyıqlandı.
Bul hújjet kiberkorrupciyaǵa qarsı nátiyjeli gúresiw, bekkem huqıqıy baza jaratıw, korrupciyaǵa qarsı gúresiwge qaratılǵan joybarlardı ámeliyatqa engiziw, jaslar arasında úgit-násiyat jumısların alıp barıw hám media kontentlerdi tayarlaw sıyaqlı baǵdarlardı óz ishine aladı.
Korrupciyaǵa qarsı gúresiw agentligine jumısshı topardıń jumısın nátiyjeli shólkemlestiriw boyınsha wazıypa júklendi. Agentlik janında málimleme-tallaw toparı shólkemlestirilip, ol kiberkorrupciyaǵa baylanıslı maǵlıwmatlardı jámlew, tallaw hám nátiyjelerdi Oliy Majliske berip barıw menen shuǵıllanadı.
Májiliste Jaslar isleri agentligine «Korrupciya-keleshekke qáwip» ideyası tiykarında jaslar arasında kiberkorrupciyaǵa qarsı imunitetti qáliplestiriw hám nátiyjeli profilaktika sistemasın islep shıǵıw boyınsha usınıslar tayarlaw wazıypası tapsırıldı.
Ministrlik hám uyımlarǵa «Jol kartası» sheńberinde belgilengen ilajlardı óz waqtında hám sapalı orınlaw boyınsha tiyisli kórsetpeler berildi.
Májlis juwmaǵında dodalanǵan máseleler boyınsha komitetlerdiń birgeliktegi qararı qabıl etildi.

ÓzA