Qarar hám onıń orınlanıwı

Usı jıl 26-mart kúni Qaraqalpaqstan Respublikası Ministrler Keńesiniń Baslıǵı Farhod Ermanovtıń basshılıǵında respublikamızda qurılıs tarawında ámelge asırılıp atırǵan jumıslar, sonıń ishinde, Ózbekstan Respublikası Ministrler Kabinetiniń 2025-jıl 24-fevraldaǵı 110-sanlı qararınıń orınlanıwın támiyinlew hám nızamsız qurılıslardıń aldın alıw máselelerine baǵıshlanǵan májilis ótkerildi.
Májiliske rayon (qala) hákimleriniń qurılıs hám ekonomika máseleleri boyınsha orınbasarları, Qaraqalpaqstan Respublikası Prokuraturası, Ishki isler, Ádillik ministrligi hám olardıń rayon (qala) lıq strukturalıq bólimleri, Qurılıs ministrligi hám rayon (qala) lıq qurılıs bólimleri, Kadastr agentligi hám Kadastrlar palatası, “Qala qurılısı hújjetlerin ekspertiza etiw respublikalıq orayı” JShJ basqarması, kommunallıq taraw wákilleri hám nızamsız múlk iyeleri qatnastı.
Xabarıńız bar, qala qurılısı jumısında ruxsat beriw tártip-qaǵıydaların jetilistiriw maqsetinde Ózbekstan Respublikasınıń Qala qurılısı jumısında ruxsat beriw tártip-qaǵıydaların jetilistiriw maqsetinde Ózbekstan Respublikası Ministrler Kabinetiniń 2025-jıl 24-fevraldaǵı 110-sanlı qararı qabıl etilip, usı qarar tiykarında nızamsız qurılǵan qurılmalardı belgilengen tártipte Qurılıs qadaǵalaw inspekciyasınan dizimnen ótkeriw múddetleri sozdırılǵan.
Májiliste Ózbekstan Respublikası Qurılıs hám turaq jay kommunal xojalıǵı tarawında qadaǵalaw inspekciyası baslıǵınıń birinshi orınbasarı Jasur Jabborov usı qarardıń mazmun-mánisi, onıń orınlanıw barısı hám onıń orınlanıwında júzege kelip atırǵan qáte-kemshilikler haqqında maǵlıwmatlar berip, pikir-usınıslar bildirildi.
Atap ótilgenindey, 2024-jıl 23-sentyabrde qurılıs industriyası hám qurılıs materialları tarmaǵın rawajlandırıw ilajların dodalaw boyınsha ótkerilgen videoselektor májilisinde Prezidentimiz tárepinen belgilengen tártipte dizimnen ótkermesten qurılıs jumısların baslaw, obektti kategoriyasına tiykarlanıp qurılıs processlerin sistemalı qadaǵalanbay atırǵanı hám sonıń aqıbetinde obektlerde tártipsiz qurılıs jumısları sistemalı túrge engeni hám bul jaǵday puqaralardıń haqılı narazılıqlarına sebepshi bolıp atırǵanlıǵı kórsetip ótilgen.
Sonday-aq, usı jaǵdaylardıń aldın alıw hám saplastırıw, qurılıs jumısların ámelge asırıwda byurokratiyalıq tosqınlıqlar hám korrupciyaǵa shek qoyıw boyınsha 2025-jıl 1-noyabrge shekem Inspekciyanıń bar kúsh quralları hám imkaniyatların mobilizaciyalaw haqqında tapsırmalar berilgen.
Usı tapsırmalarǵa tiykarlanıp aymaqlıq inspekciyalar tárepinen sistemalı úyreniwler shólkemlestirilip, usı jıldıń 18-mart jaǵdayına Respublikada jámi 3143 obekt aymaqlıq inspekciyalardan dizimnen ótpesten, qurılıs-ońlaw jumısları ámelge asırılǵanlıǵı anıqlandı.
Joqarıda atap ótilgen 3143 nızamsız obekttiń 128 i Qaraqalpaqstan Respublikasına tuwra kelmekte. Sonıń 112 si isbilermenlik obektleri (sawda-turmıslıq xızmet kórsetiw, ofis, miymanxana, óndiris hám basqalar), úshewi sanaat zonalarında jaylasqan obektler, onı kóp qabatlı turaq jay imaratları, sonday-aq, úshewi jeke menshik turaq jay imaratları bolıp esaplanadı.
Nızamsız hám tártipsiz qurılıslardıń barǵan sayın artıp barıwına bir jaǵınan jergilikli hákimlikler, Qurılıs basqarmaları, rayon (qala) lıq qurılıs bólimleri hám máhálleler tárepinen nızamsız qurılmalarǵa óz wákilligi sheńberinde mawasasız gúres alıp barmay atırǵanlıǵı hám basqa da faktorlar sebepshi bolmaqta.
Májiliste Ministrler Keńesiniń Baslıǵı F.Ermanov Qaraqalpaqstan Respublikasınıń qurılıs hám turaq jay kommunal xojalıǵı tarawında qadaǵalaw inspekciyası tárepinen yanvar-mart ayında anıqlanǵan nızamsız qurılıslar haqqında óz pikir-usınısların bildirdi.
Nókis qalası boyınsha 37, Ámiwdárya rayonı boyınsha 19, Beruniy rayonı boyınsha 7, Shımbay rayonı boyınsha 5, Ellikqala rayonı boyınsha 11, Kegeyli rayonı boyınsha 4, Moynaq rayonı boyınsha 1, Qanlıkól rayonı boyınsha 5, Qaraózek rayonı boyınsha 3, Qońırat rayonı boyınsha 5, Shomanay rayonı boyınsha 9, Taqıyatas rayonı boyınsha 1, Taxtakópir rayonı boyınsha 1, Tórtkúl rayonı boyınsha 7, Xojeli rayonı boyınsha 6 nızamsız qurılıs obektleri anıqlanǵan.
– Aymaqlıq inspekciyalardan belgilengen tártipte dizimnen ótpesten baslanǵan, nızamsız qurılıs jumısları obekttiń iyelerine kóplegen mashqala hám materiallıq zıyanlardı keltirip, bul obektke iyelik etiwdi hám obektti basqarıw imkaniyatın joqqa shıǵaradı. Bunday jaǵdaylar isbilermenlerge qosımsha mashqalanı, qárejetlerdi keltirip shıǵaradı. Qurılǵan obekttiń úlkenligine qarap, bul summalar úlkeyip baradı,-deydi J.Jabborov. – Rayon (qala) hákimlikleri, rayon (qala) hákimlikleriniń qurılıs máseleleri boyınsha orınbasarları hám basqa da juwapkerler qısqa múddette nızamsız obektlerdi legallastırıw ilajın kóriwi zárúr.
Májiliste Ministrler Kabinetiniń 2025-jıl 24-fevraldaǵı 110-sanlı qararına tiykarlanıp nızamsız obektlerdi aymaqlıq qadaǵalaw inspekciyaları diziminen ótkeriw ushın ruxsatnama beriw tártip-qaǵıydaları tuwralı túsinikler berilip, qáte-kemshiliklerdi tez arada saplastırıw, aldaǵı islenetuǵın jumıslar boyınsha tiyisli tapsırmalar berildi.

Á.Jiyemuratov,
Qaraqalpaqstan xabar agentligi