“Yuksalish” háreketi, Ózbekstan Notarial palatası birgelikte bes jıldan berli respublikalıq kólemde “Huqıqıy másláhátler kúni” biypul akciyasın ótkerip kelmekte. Usı akciya sheńberinde notariuslar tárepinen xalıqqa biypul másláhátler beriliwi dástúrge aylanǵan.

Bunday ilaj bıyıl da 26-27-mart kúnleri respublikamızdıń barlıq qala hám rayonlarındaǵı notariuslerde ótkeriliwi belgilengen.
Usı jıl 26-mart kúni Nókis qalası Pushkin kóshesi 45-jaydaǵı notariusler imaratında “Yuksalish” háreketi, Ózbekstan Notarial palatası Qaraqalpaqstan Respublikası aymaqlıq basqarması menen birgelikte gezektegi biypul huqıqıy akciyası shólkemlestirildi.
Akciyanı ótkeriwden maqset – puqaralardıń huqıqıy bilimin, mádeniyatın arttırıw, xalıq penen óz-ara baylanıs mexanizmlerin jaratıw, huqıqtı qollanıw tarawında ámeldegi mashqala hám kemshiliklerdi anıqlaw hám olardı saplastırıwǵa qaratılǵan pikir-usınıslardı tayarlawdan ibarat.
Akciya dawamında notariusler tárepinen puqaralarǵa notarial hújjetlerin rásmiylestiriw boyınsha biypul huqıqıy másláhátler berildi.
Atap aytqanda, notariusler tárepinen ámelge asırılatuǵın notarial háreketler, Notarial mákemelerinde notarial is júrgiziw qaǵıydaları hám “E-notarius.uz” málimleme portalı haqqında keń túrde túsinikler berildi.
Akciya sheńberinde puqaralarǵa shańaraq huqıqı, múlk hám múlklik emes huqıq hám minnetlemeler haqqında, sonday-aq, miyras, neke, sawǵa, ijara, múlk aldı-sattı shártnamaları, miyras wásiyatnamaları hám basqa da túrli mashqalalı máseleler boyınsha túsinikler berilip, biypul yuridikalıq járdemler kórsetildi.
– Men Qazaqstanda jasap atır edim. Nókis qalasındaǵı jayımdı satıp atır edim. Onı satıp alatuǵın adam bankten kredit shıǵarıp, pul ótkeriw jolı menen tóleytuǵın bolıp atır edi. Sonlıqtan, jaydı ózimniń sińlimniń atına ótkerip, ol arqalı satayın dep oylasıp atırman. Notariuske kelgenimizde qanday hújjetler kerek ekenligi, aldı-sattı shártnamanı rásmiylestiriw tártipleri boyınsha túsiniklerge iye boldıq. Biziń keliwimiz biypul akciyaǵa tuwra kelgeninen quwanıshlımız, jumısımız tez pitti, tiyisli másláhátler aldıq,-deydi puqaralardıń biri G.Shanazarova.
Ilaj dawamında puqaralar qánigelerden ózlerin qızıqtırǵan sorawlarına juwap aldı.
Bul baǵdardaǵı ilajlar orınlarda dawam etpekte.

Á.Jiyemuratov,
Qaraqalpaqstan xabar agentligi.
(M.Habibullaevtıń túsirgen súwretleri)