Respublikamızdıń barlıq xojalıqların, hátteki eń uzaq awıllarında jasap atırǵan xojalıqlardı da suyılttırılǵan gaz benen támiyinlew jolǵa qoyılǵan bolıp, bul jumıslardıń sapasın arttırıw boyınsha unamlı háreketler alıp barılmaqta.

Qońırat rayonı da respublikamızdıń shetki aymaǵında jaylasqan bolıp, Qazaqstan Respublikası menen shegaralas rayon sanaladı. Rayonda jámi 27 mıńnan aslam gazden paydalanıwshı tutınıwshılar bar. Sonnan, 26 360 jeke xojalıqtıń 3597 si kóp qabatlı jaylarda jasaydı.
– Sonday-aq, rayonda 644 kótere tutınıwshılar bar. Olar tiykarınan ónim islep shıǵarıw hám xalıqqa turmıslıq xızmet kórsetiw menen shuǵıllanıp kelmekte,-deydi Końırat rayonlık gaz tamiynatı bóliminiń suyılttırılǵan gaz xızmetiniń baslıǵı Baxıt Bayniyazov.
Al, rayon orayınan uzaqta jaylasqan elatlı punktlerde, yaǵnıy, tábiyǵıy gaz jetip barıwı qıyın sanalǵan Ádebiyat, Ájiniyaz, Kókdárya, Qıpshaq, Ráwshan, Súwenli, Ústirt hám Xorezm awıl puqaralar jıyınlarında, jámi 2893 xojalıq suyılttırılǵan gazge beyimlestirilgen.
Usı suyılttırılǵan gaz tutınıwshılarına rayonda jaylasqan «Qońırat gaz toltırıw» shaqapshası arqalı gaz ballonlar jetkerip beriledi. Rayon aymaǵındaǵı hár bir suyılttırılǵan gaz tutınıwshısı gaz támiynatı xızmetkerleriniń dıqqat itibarında bolıp, hákimiyat penen birge tastıyıqlanǵan reje-grafik tiykarında suyılttırılǵan gaz ballonları óz waqtında irkinishsiz, arnawlı transportlarda turaqlı túrde jetkerip berilmekte. Suyıltırılǵan gaz tutınıwshılarına bıyılǵı jıl basınan 84,2 tonna suyılttırılǵan gaz jetkerip beriw rejelestirilip, ámelde 86,6 tonna suyılttırılǵan gaz jetkerip berilgen.

Á.Jiyemuratov,
Qaraqalpaqstan xabar agentligi.