Xojalıq jámiyetleri basqarıw uyımlarınıń májilisinde aralıqtan qatnasıw tártibi belgilendi. Ózbekstan Respublikası Ádillik ministrligi tárepinen 2025-jıl 24-mart kúni dizimnen ótkerilgen jańa rejege bola, xojalıq jámiyetleri basqarıw uyımlarınıń májilislerinde málimleme-kommunikaciya texnologiyalarınan paydalanǵan halda aralıqtan turıp qatnasıw hám dawıs beriw tártibi belgilendi.

Bul reje akcionerlik jámiyetleri hám juwapkershiligi sheklengen jámiyetler ushın mólsherlengen bolıp, sanlı imkaniyatlar arqalı qatnastı jáne de ápiwayılastırıwǵa qaratılǵan.
Rejede jámiyetler tárepinen májilis haqqındaǵı xabarda aralıqtan qatnasıw hám dawıs beriw tártibi haqqında anıq maǵlıwmatlar keltiriliwi shárt ekenligi belgilengen. Sonıń ishinde, májiliste paydalanılatuǵın onlayn platformanıń atı, oǵan kiriw siltemesi, identifikaciyadan ótiw ushın talap etiletuǵın maǵlıwmatlar hám texnikalıq járdem kórsetiwshi shaxstıń tolıq atı hám telefon nomerleri kórsetiledi.
Jańa tártipke bola, qatnasıwshılar videokonferencbaylanıs platformaları arqalı tikkeley májilis procesinde qatnasıwı múmkin boladı. Bul bolsa olarǵa fizikalıq túrde qatnaspay turıp, dodalawlarda qatnasıw hám dawıs beriw imkaniyatın beredi.
Bul Reje mámleketlik uyımlar, isbilermenlik subektleri hám jámiyet aǵzaları arasındaǵı málimleme almasıwın zamanagóylestiriw, nátiyjelilikti arttırıw hám ashıq-aydınlıqtı támiyinlewge xızmet etedi. Sonday-aq, májilislerde qatnasıw ushın waqıt hám resurslardı únemlew imkaniyatın jaratadı.
Atap ótiliwinshe, bul buyrıq rásmiy járiyalanǵan kúnnen baslap úsh ay ótkennen soń, yaǵnıy 2025-jıldıń iyun ayınan baslap ámeliyatqa engiziledi.

Qaraqalpaqstan xabar agentligi