Ózbekstanda xalıqqa qıstawlı járdem kórsetiwdi jáne de nátiyjeli shólkemlestiriwge qaratılǵan «112» dispetcherlik xızmeti respublikanıń barlıq aymaqlarında iske qosıldı. Bul haqqında Sanlı texnologiyalar ministrligi málim etti.
2023-jıl iyulde Ferǵana qalasında ótkerilgen májiliste Shavkat Mirziyoev Ishki isler hám Sanlı texnologiyalar ministrlikleri aldına birden-bir «112» operativ nomeri hám dispetcherlik sistemasın iske qosıw wazıypasın qoyǵan edi. Nátiyjede, Ministrler Kabinetiniń qararı menen usı xızmet basqıshpa-basqısh engizildi.
Húkimet qararına muwapıq xızmet 2024-jıl 1-iyunnan Tashkent qalası hám Tashkent wálayatında, 2024-jıldıń birinshi yarım jıllıǵında Ándijan, Namangan hám Ferǵana wálayatlarında, 2024-jıldıń aqırına shekem Qaraqalpaqstan Respublikası hám qalǵan wálayatlarda jumıs baslawı rejelestirilgen edi.
«112» birden-bir dispetcherlik xızmeti ishki isler, ayrıqsha jaǵdaylar, qıstawlı medicinalıq járdem, sociallıq qorǵaw hám «Hudugaztaminot» sıyaqlı xızmetlerdi birlestirip, xalıqtıń múrájatlerin qabıllaw hám qayta islewde birden-bir platforma wazıypasın atqaradı.
Qaraqalpaqstan xabar agentligi