Qazaqstan Respublikasınıń Manǵıstaw oblastı Aqtaw qalasında usı jıldıń 22-25-mart kúnleri aralıǵında bolıp ótiwi rejelestirilgen “Made in Uzbekistan” atamasındaǵı sawda yarmarkasında Qaraqalpaqstanlı isbilermenler de belsene qatnaspaqta,-dep xabar bermekte Sawda-sanaat palatası Qaraqalpaqstan Respublikası basqarmasınıń málimleme xızmeti.

Eń áhmiyetlisi ilajda awıl xojalıǵı, sanaat, ónermentshilik hám basqa da tarawlarda jumıs alıp barıwshı 30 dan aslam qaraqalpaqstanlı isbilermenler de óz ónimleri menen belsene qatnasıp atır.
Ilaj mámleketimizdiń eksportlıq potencialın kórsetiw, xalıqtı arzan hám sapalı ónimler menen támiyinlew, sonday-aq, Ózbekstan hám Qazaqstan isbilermenleri arasında jańa isbilermenlik baylanısların ornatıwǵa járdemlesiw maqsetinde Ózbekstan Sawda-sanaat palatasınıń járdeminde shólkemlestirildi.
Tórt kún dawamında yarmarkada respublikamızdıń barlıq aymaqlarınan 60 tan aslam kárxanalardıń ónimleri kórsetiledi. Miymanlar azıq-awqat, toqımashılıq, ónermentshilik, bılǵarı, elektrotexnika, qurılıs hám mebel sanaatınıń joqarı sapalı ónimlerin satıp alıw imkaniyatına iye boladı.
“Made in Uzbekistan” yarmarkası milliy ónimlerdi ǵalaba en jaydırıw, básekige shıdamlılıǵın kórsetiw, qazaqstanlı sherikler menen sawda-ekonomikalıq birge islesiwdi bekkemlewge xızmet etedi.

Qaraqalpaqstan xabar agentligi