Mámleketimizde aeroportlar infrastrukturasın rawajlandırıw, jolawshı hám júk tasıw kólemin hár jılı arttırıp barıw, aymaqlardaǵı aeroportlarda ketring hám basqa xızmetlerdi jolǵa qoyıw baǵdarında bir qatar reformalar ámelge asırılmaqta.
Atap aytqanda, «Uzbekistan airports» akcionerlik jámiyetiniń nátiyjeliligin keńeytiw boyınsha da bir qatar ilajlar islep shıǵılǵan.
Tashkent aeroportında jańa júk tasıw terminalı paydalanıwǵa tapsırılıwı múnásibeti menen baspasóz ánjumanı bolıp ótti.
Atap ótiliwinshe, jılına 120 mıń tonna júk tasıw quwatlılıǵına iye jańa júk kompleksi 5,2 gektar maydanda jaylasqan bolıp, úsh qabatlı hákimshilik imarat, túrli tovarlardı saqlawǵa mólsherlengen qoymaxana, sonday-aq, jeńil hám júk mashinaları ushın toqtaw ornın óz ishine aladı.
Qoymaxana 8 mıń 500kv/m maydandı iyeleydi hám onıń ishinde belgili bir temperatura rejimin saqlaw talap etetuǵın tovarlar ushın 500 kv/m maydandaǵı suwıtıw hám muzlatıw kameraları bar. Atap aytqanda, qoymaxanada ósimlik hám tiri haywanlar, bahalı júkler, azıq-awqat ónimleri, dári-dármaqlardı saqlaw ushın arnawlı xanalar qurılǵan. Barlıq arnawlı xanalar temperatura ólshegishleri menen úskenelengen.
1994-2000-jıllarda qurılǵan eski júk terminalı ulıwma maydanı 3 gektarǵa shekem keletuǵın 20ǵa shamalas eskirgen kishi hám orta qoymaxana hám hákimshilik imaratlardan quralǵan edi. Júk terminalınıń ótkeriw quwatlılıǵı negizinde 30 mıń tonnanı quraydı. Ótken 2024-jılı Tashkent aeroportı 80 mıń tonnaǵa shamalas júk hám pochta jóneltpelerin qabıl etken. Hákimshilik hám ijarashılar jaylasqan imarat hám obektler de eskirgen. Bulardıń barlıǵı júk tasıw kompleksin keńeytiw hám modernizaciyalaw zárúrligin talap etken. Eski terminaldan jańa terminalǵa basqıshpa-basqısh ótiledi.
Sonday-aq, qoymaxana jumısı ushın dúnyanıń jetekshi islep shıǵarıwshılarınan zamanagóy úskeneler, atap aytqanda, júk saqlaw stelajları, júk kóteriw hám tasıw, qadaqlaw úskeneleri hám esap-sanaq, avtomatlastırıw hám qáwipsizlikti támiyinlew úskeneleri satıp alındı. Bul júklerdi qayta islew waqtın qısqartadı hám aviatasıwshılarǵa ulıwma tán alınǵan xalıqaralıq standartlarǵa muwapıq sapalı xızmet kórsetiwdi támiyinleydi.
Bunnan tısqarı, UzCargo xızmetkerleri, tiyisli xızmetler (bajıxana, veterinariya hám ósimlikler karantini hám basqalar), import hám eksport kompaniyalarınıń wákilleri, aviakompaniyalar hám deklarantlar, sonday-aq, júk qabıl etiwshiler ushın 3000 kv/m maydanǵa iye úsh qabatlı jańa hákimshilik imarat qurılıp, paydalanıwǵa tapsırıldı.
Muhayyo TOShQOROEVA, ÓzA