2025-jıl 24-mart kúni Oliy Majlis Senatında Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı O.Matkarimov Vetnam Socialistlik Respublikasınıń Ózbekstandaǵı Ayrıqsha hám Tolıq-huqıqlı elshisi Dan Min Kxoy menen ushırastı.

Ushırasıwda Ózbekstan hám Vetnam arasındaǵı eki tárepleme birge islesiwdiń búgingi jaǵdayı hám onı rawajlandırıw perspektivaları, sonıń ishinde, sawda-ekonomikalıq, mádeniy-gumanitarlıq hám turizm tarawlarındaǵı qatnasıqlar dodalandı.
Atap ótilgenindey, 2024-jılı eki mámleket arasındaǵı tovar almasıw kólemi 189,3 mln AQSh dolların quraǵan, sonnan eksport 17,7 mln dollar, import bolsa 175,6 mln dollardı quradı.
Sonday-aq, ushırasıwda turizm tarawındaǵı úlken potencialǵa itibar qaratıldı. Mámleketlerdiń puqaraları arasında óz-ara turistlik saparlardı keńeytiw máselesi dodalandı.
Sóylesiw dawamında bıyılǵı jılı 5-9-aprel kúnleri Tashkent qalasında Parlamentleraralıq awqamnıń 150-yubiley assambleyası ótkeriliwi haqqında maǵlıwmat berildi. Atap ótilgenindey, bul abıraylı ilaj tariyxta birinshi márte Ózbekstanda ótkerilmekte hám onda Parlamentleraralıq awqamnıń 190ǵa shamalas aǵza mámleketlerinen 2000 ǵa shamalas parlament aǵzaları qatnasadı.
Elshi Vetnam Milliy Májilisi Baslıǵı CHan Txan Man basshılıǵındaǵı 120 ǵa shamalas delegaciya aǵzaları da usı Assambleyada qatnasatuǵının málim etti.
Ushırasıw juwmaǵında Parlamentleraralıq awqam ánjumanına tayarlıq jumısları, shólkemlestiriw máseleleri hám eki tárepleme birge islesiwdi jáne de rawajlandırıw boyınsha pikir alısıldı.

Qaraqalpaqstan xabar agentligi