Prezidentimizdiń baslaması menen elimiz boylap ámelge asırılıp atırǵan máhálle qıytaq jerlerinen nátiyjeli paydalanıwdı shólkemlestiriw arqalı xalıqtıń bántligi hám dáramatların arttırıwǵa qaratılǵan jumıslardı jáne de jedellestiriw maqsetinde orınlarda bir qatar ilajlar ámelge asırılmaqta.

Xojeli rayonına biriktirilgen wákil Ózbekstan Respublikası Ósimlikler karantini hám qorǵaw agentliginiń direktorı Ibrohim Ergashev rayondaǵı bir qatar máhállelerde bolıp, xalıqtıń turmıs tárizin hám jasaw sharayatların úyrendi.
Rayondaǵı awır aymaqqa kirgen Kún nurı, Samankól, Qumjıqqın hám Ámiwdárya máhálleleriniń turǵınlarına jaqınnan járdemler kórsetilip, búgingi kúnge shekem 50 mıńnan aslam shiye nálleri tarqatılıp, egiw jumısları qızǵın dawam etpekte. Úyreniw dawamında respublikadan biriktirilgen wákil I.Ergashev hám rayon hákimi J.Ermashev tárepinen kúni keshe rayon aymaǵında egislik jerlerdiń sapasın ele de jaqsılaw maqsetinde 13 dana minikultivator, 1100 danadan bel, ketpen, shelek sıyaqlı jumıs quralları biypul tarqatıldı. Bunnan tısqarı máhállelerdegi ıssıxana xojalıqların rawajlandırıw baǵdarında hár bir máhállege 100 danadan ıssıxanalardı qurıw rejelestirilip, qurılıs jumısları baslap jiberildi hám olarǵa tájiriybeli qánigeler biriktirildi.
Kollektor-drenaj, jap-salma boylarında arnawlı texnikalar menen tazalaw jumısları ámelge asırılıp, izeykeshlerdiń jaǵaları úyrekshilik penen shuǵıllanıwdı qálewshi puqaralarǵa bólip berildi.

Qaraqalpaqstan xabar agentligi