Gazanıń qublasına shólkemlestirilgen hújimde Palestinanıń XAMAS háreketi siyasiy byurosınıń aǵzası Saloh Al-Bardavil qaytıs boldı. Bul haqqında Izrail qorǵanıw kúshleriniń baspasóz xızmeti xabar bergen.

– Ekshembi kúni keshqurın CAXAL hám Ulıwma qáwipsizlik xızmeti sektor qublasında XAMAStıń Rejelestiriw hám rawajlandırıw bólimi basshısın joq etti, – delingen bildiriwde.
Bunnan aldınıraq «Al Hadath» telekanalı marhum hámeldar Izrail Xon-Yunis qalası shetindegi mánzilge bergen soqqınıń nátiyjesinde ómirden kóz jumǵanı haqqında xabar bergen edi.
Saloh Al-Bardavil Palestinanıń bir palatalı parlamenti – Nızamshılıq keńesiniń aǵzası, Xon-Yunistegi rásmiy wákili edi.
18-mart kúni Izrail armiyası Gaza sektorında jawıngerlik háreketin dawam ettirip, anklavqa kúshli soqqı berdi hám sol tárizde yanvar ayında ornatılǵan kelisimdi buzdı. Bas ministr Binyamin Netanyaxudıń uyımı bul qarardı XAMAS dáldalshıları hám AQSh Prezidentiniń arnawlı wákili Stiven Uitkoff tárepinen sóylesiw waqtında alǵa qoyılǵan usınıstıń biykarlanıwı menen túsindirip, ámeliyattan gózlengen maqset barlıq girewge alınǵanlardı azat etiw ekenin atap ótti.
Óz gezeginde, topar urıstıń baslanıwında Izrail hám AQShtı ayıpladı.

Qaraqalpaqstan xabar agentligi