Bıyılǵı jıldıń 11-mart sánesinen baslap Prezidentimizdiń “Máhállelerde qıytaq jerlerden nátiyjeli paydalanıwdı shólkemlestiriw arqalı xalıqtıń bántligin hám dáramatların arttırıwǵa qaratılǵan jumıslardı bunnan bılay da jedellestiriw haqqında”ǵı biyligine tiykarlanıp respublikamız boylap «Áhmiyetli bir aylıq» járiyalanǵan edi.

Maqset – kámbaǵal shańaraqlarǵa dáramat tabıw baǵdarların, olarǵa qıytaq jerden nátiyjeli paydalanıw arqalı jılına bir neshe márte ónim alıw hám dáramatın arttırıw jolların úyretiw.
Sonday-aq, usı arqalı shańaraqlardıń abadanlıǵın támiyinlewge qaratılǵan ilajlardıń nátiyjeliligin jáne de arttırıwdı názerde tutadı.
– Qızıl-qala awıl puqaralar jıyını tiykarınan diyqanshılıq hám sharwashılıqqa qánigelesken aymaqlardan esaplanadı. Awıl puqaralar jıyınında keyingi jılları ıssıxana, baǵshılıq, qusshılıq ta keńnen rawajlandı, – deydi Beruniy rayonı hákimligi Málimleme xızmeti bólimi baslıǵı A.Urazova.
Usı aymaqta jasawshı Djarımbetova Gúlbazar qıytaq jerinen jaqsı paydalanıp kiyatırǵan shańaraqlardan esaplanadı. “Áhmiyetli bir aylıq” ilajları sheńberinde shańaraǵında 1 sotix ıssıxana shólkemlestirgen bolıp, ıssıxana ishinde ovoщ, palız eginleriniń nállerin jetistirip, nállerdi óz qıytaq jerlerine hám awısqan bólegin kem támiyinlengen shańaraqlarǵa tarqatıwdı rejelestirgen. Sonıń menen birge, ol jasıl mákan joybarı sheńberinde 300 túp pavloniya teregi nállerin, 100 túp miyweli tereklerdi ekken.
Rayon Málimleme xızmeti bólimi bergen maǵlıwmatlarǵa bola, “Áhmiyetli bir aylıq” ilajları sheńberinde rayon hákiminiń baslaması menen jańadan 20 shańaraqqa ıqsham ıssıxanalar qurılıp berilip, házirgi waqıtta ovoщ, palız eginleriniń nálleri jetistirilmekte.

Qaraqalpaqstan xabar agentligi