Paydalanıwshınıń shaxsın onıń klaviaturada tekstti qalay teriwine qarap anıqlaytuǵın sistema islep shıǵıldı, dep xabar berdi Naked Science.

Bul texnologiya tekst teriw tezligi, klavishti basıw dinamikası, qáteler tákirarlanıwı hám basqa táreplerdi baqlap baradı. Bul maglıwmatlar shablonlar bazası menen salıstırıladı. Eger kórsetkishler sáykes kelse, sistema shaxstı tastıyıqlaydı. Jazıw ádeti (“klaviatura qoltańbası”) ózgerse, shablon avtomat túrde jańalanadı.
Qollanba avtorları – MIREA-Rossiya texnologiya universitetiniń “Málimlemeni qorǵaw” kafedrası studentleri Viktoriya Evryukova hám Matvey Stolnikov. Olardıń aytıwınsha, shaxstı anıqlaw ushın “klaviatura qoltańbası” úshinshi faktor sıpatında engizilse, qosımsha úskeneler talap etpegen halda málimleme qáwipsizligin arttırıw múmkin.
Jańa sistemadan kishi firmalardan baslap iri korporaciyalarǵa shekem paydalanıwı múmkin ekenligi aytılmaqta.
Qollanba avtorları endi insannıń fizikalıq jaǵdayı onıń klaviaturada jazıw usılına qanday tásir kórsetiwin úyrengisi keledi. Bul sistema anıqlıǵın jaqsılaw imkaniyatın beredi,- dep málimleme beredi xabar.uz saytı.

Qaraqalpaqstan xabar agentligi