Ájiniyaz atındaǵı Nókis mámleketlik pedagogikalıq institutı jámááti hám student-jasları elimizde ekologiyalıq turaqlılıqtı támiyinlew, qorshaǵan ortalıqtı qorǵaw hám bul arqalı xalıqtıń turmıs tárizin jaqsılawǵa baǵdarlanǵan «Jasıl mákan» ulıwma milliy joybarı sheńberindegi abadanlastırıw jáne kóklemzarlastırıw jumısların dawam ettirmekte,-dep xabar bermekte instituttıń baspasóz xatkeri I.Mátekov.

Usı jıl 23-mart kúni instituttıń belsendi studentleriniń qatnasıwında paytaxtımızdaǵı Shadlı awıl mákan puqaralar jıyını aymaǵındaǵı ajıratılǵan jer ornında nál egiwge tayarlıq jumısların alıp bardı.
Bul jerde jaslar ustazlarınıń basshılıǵında jabayı shóplerden hám shıǵındılardan tazalaw jumısların ámelge asırdı.
– Bıyılǵı báhár máwsiminde «Jasıl mákan» ulıwma milliy joybarı sheńberinde institutımız tárepinen paytaxtımız Nókis qalası hám onıń átirapında «jasıl belbew» payda etiw maqsetinde 11 mıń túp hár qıylı miyweli hám dekorativ terek nállerin otırǵızıw rejelestirilgen. Álbette, bul arqalı jasıl aymaqlardı keńeytiw, hawanıń sapasın jaqsılaw, globallıq klimat ózgerisleriniń unamsız aqıbetlerin azaytıw, sonday-aq, xalıqtıń, sonıń ishinde, jaslarımızdıń ekologiyalıq juwapkershiligin arttırıw – biziń tiykarǵı maqsetimiz,-deydi instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Q.Reymov.
Bunday ilajlar tábiyattı qorǵawdıń nátiyjeli usılın payda etiw menen birgelikte, keleshek áwladlarǵa taza hám salamat ortalıqtı qaldırıwǵa tiykar jaratadı.
Institutta akciya sheńberindegi abadanlastırıw ilajları dawam etpekte.

Qaraqalpaqstan xabar agentligi.