Ózbekstan Respublikası Prezidentiniń Qaraqalpaqstan Respublikasına saparı dawamında belgilep berilgen wazıypalardıń orınlanıwın támiyinlew maqsetinde, Taxtakópir rayonı Ǵárezsizlik mákan puqaralar jıyını «Doslıq gúzarı» kóshesi boyınan zamanagóy kórinistegi 24/7 sistemada xızmet kórsetiwshi gastronomiyalıq kóshe qurıp pitkerilip, paydalanıwǵa tapsırıldı.
Nawrız bayramı aldında jańa obekttiń ashılıw saltanatı ótkerildi.
Onda Qaraqalpaqstan Respublikası Joqarǵı Keńesiniń komitet baslıǵı Murat Atamuratov, rayon hákimi Jambul Adilovlar ilaj qatnasıwshıların Nawrız bayramı hám jańa imaratlardıń ashılıwı menen qutlıqlap, sońǵı jılları húrmetli Prezidentimizdiń Qaraqalpaqstanǵa itibarı hám ǵamqorlıǵınıń arqasında kóplegen iygilikli islerdiń ámelge asıp atırǵanlıǵına ayrıqsha toqtap ótip, bul jańa xızmet kórsetiw orınlarınıń jumısları tabıslı bolıwına tilekleslik bildirdi.
Sonı aytıp ótiw orınlı, zamanagóy kórinistegi derlik kúni-túni xalıqqa xızmet kórsetiwshi gastronomiyalıq kósheni búgingidey abadan kóriniske keltiriw ushın 2 mlrd. sum qarjı ajıratılıp, qurılıs jumısları alıp barıldı.
Házirgi waqıtta bul jerde jámi 23 sawda hám xızmet kórsetiw orınları, sonnan 10 azıq-awqat ónimlerin satıw ornı, 3 gózzallıq salonı hám shashtárezxana, 2 gósh ónimlerin satıw ornı, 2 awqatlanıw ornı hám 6 basqa baǵdarlar boyınsha xızmet kórsetiw orınları shólkemlestirilgen.
Qaraqalpaqstan xabar agentligi