Prezident Shavkat Mirziyoev 20-mart kúni Tashkent qalasında ámelge asırılıp atırǵan qurılıs hám abadanlastırıw jumısları menen tanıstı.

Mámleketimizde investorlarǵa jaratılǵan qolaylıqlar sebepli ekonomikada jeke menshik sektordıń úlesi artıp barmaqta. Tikkeley investiciyalar kirgizilip, sanaat, qurılıs, sawda, xızmet kórsetiw tarawlarında perspektivalı joybarlar ámelge asırılmaqta.
Paytaxtımızdıń Yunusabad rayonında qurılǵan «High Town City» kompleksi usılardan biri. Ol keń kólemli bolıp, sawda hám kewilashar orayı, biznes orayı, miymanxana hám zamanagóy turaq jaylardı óz ishine alǵan. Oǵan 510 million dollar tolıq sırt el investiciyası qaratılǵan.
Mámleketimiz basshısı sawda orayındaǵı zamanagóy kommerciya hám xızmet túrlerin kózden ótkerdi. 4 qabatlı imaratta sawda dúkanları, sonıń ishinde, belgili brendlerdiń shaqapshaları ashılǵan. Restoran hám kafeler, kewilashar oyın orınları, sport maydanları, kinoteatrlar el xızmetinde. Jerdiń astında avtomobil turıw ornı bar.
Bir sóz benen aytqanda, bul jerde adamlar sawda islewi, dem alıwı, sport penen shuǵıllanıp, waqıtın xosh ótkeriwi ushın barlıq sharayatlar jaratılǵan. Kompleks bir kúnde 5 mıń adamǵa xızmet kórsetiw quwatlılıǵına iye. Onda 1 mıń 500 adam jumıs penen támiyinlendi.
Prezidentimiz komplekstiń ekonomikalıq áhmiyeti hám xalıq ushın qolaylıǵın atap ótip, investor hám isbilermenlerge járdem beriw bunnan keyin de mámleketimiz siyasatınıń strategiyalıq baǵdarı bolıp qalatuǵının atap ótti. Milliy ónimlerimizdi brendke aylandırıw, olardı sırtqı bazarlarda tanıstırıw boyınsha juwapkerlerge kórsetpeler berdi.
Sawda orayında ıqsham kitap dúkanı da ashılǵan. Shavkat Mirziyoev bul baslamanı qollap-quwatlap, metro bándirgileri, kútiw orınlarında da ıqsham kitap dúkanların shólkemlestiriw maqsetke muwapıq ekenligin ayttı.
Mámleketimiz basshısı oyın maydanshasındaǵı balalardı kórip, shın kewilden mehir-itibarın bildirdi. Házirgi barlıq háreketler mámleketimiz keleshegi ushın islenip atırǵanı, onıń ushın balalar jaqsı oqıp, intellektuallıq hám dóretiwshilik imkaniyatın rawajlandırıp barıwı kerek ekenligin atap ótti.
Jaqında 24 qabatlı, bes juldızlı miymanxana da qurılıwı rejelestirilgen. Onda 250 xana bolıp, bir waqıttıń ózinde 430 adamǵa xızmet kórsetiw imkaniyatına iye boladı. Úlken hám kishi konferenciya zalları, júziw basseynleri, restoran hám dúkanlarda zamanagóy qolaylıqlar jolǵa qoyıladı.
Mámleketimiz basshısına usı jerde qurılatuǵın zamanagóy turaq jaylardıń joybarı tanıstırıldı. Oǵan bola, 1 mıń 500 kvartiradan ibarat 28 kóp qabatlı turaq jay qurıladı. Kompleks háwlisi avtomobiller ushın jabıq hám jasıl aymaq boladı. Balalar baqshası, oyın maydanshası, tennis kortı, jer astı avtomobil turıw ornı shólkemlestiriledi. Kompleks aymaǵı tolıq Wi-Fi menen qamtıp alınadı hám imaratlarǵa shawqımsız liftler ornatıladı.
Tashkent qalasında jámiyetlik transporttı rawajlandırıw joybarları da kórip shıǵıldı. Bizge belgili, Tashkent metropolitenin Tashkent traktor zavodına shekem alıp barıw rejelestirilgen. Prezidentimiz aldın usınıs etilgen joybarlardı qayta kórip shıǵıw, basqa da qolaylı usınıslar kirgiziw boyınsha tapsırma bergen edi. Soǵan muwapıq tayarlanǵan jańa joybarǵa bola, Ullı jipek jolı metrosınan Tashkent traktor zavodına shekem 10 bándirgi qurıladı. Bul tarmaq 30 máhálle, 148 mıń xalıqtı qamtıp aladı.
Jáne bir joybarǵa bola, Bektemir rayonında Shırshıq dáryası janında kóp qabatlı turaq jaylar, sawda hám xızmet imaratların qurıw názerde tutılǵan. Onıń nátiyjesinde rayonda urbanizaciya jedellesip, jańa oray payda boladı.
Prezident Shavkat Mirziyoev paytaxtımızdıń Bektemir rayonına saparı waqtında Iykota máhállesinde bolıp, qurılıs hám abadanlastırıw jumısları menen jaqınnan tanıstı.
Bul jerdegi 37 kóp qabatlı turaq jay hám 1 mıń 400 háwlide 6 mıńǵa shamalas xalıq jasaydı. Mámleketimizde máhálle kesiminde ámelge asırılıp atırǵan mánzilli jumıslar Iykotada da óziniń nátiyjesin bermekte. Jańa kóp qabatlı turaq jaylar qurılǵan. Jollar hám ishki kósheler ońlanǵan. Maydanshalarǵa gúl hám kók shópler egilgen.
Ótken jılı úsh qabatlı máhálle uyımınıń paydalanıwǵa tapsırılǵan edi. Endi mámleketlik byudjet esabınan 358-ulıwma bilimlendiriw mektebi qurıldı. Prezidentimiz bul jańa kompleksti kózden ótkerdi.
Bilimlendiriw sistemasına qaratılıp atırǵan itibardıń ayqın kórinisin bul jerde de kóriw múmkin. Derlik mıń orınlıq mektepte ilim xanaları, kompyuter hám shet tili xanaları, robototexnika dógeregi, laboratoriya zárúr oqıw úskeneleri menen támiyinlengen. Kitapxana, sport zalı, futbol maydanı hám asxanada balalar ushın keń qolaylıqlar jaratılǵan.
Pedagoglar menen sóylesiw waqtında balalardıń qábiletin durıs qáliplestiriw, kásiplik bilimlendiriwdi rawajlandırıp, pitkeriwshilerdi qásip-ónerli etip turmısqa jollaw áhmiyetli ekenligi atap ótildi. Atap aytqanda, málimleme texnologiyaları, robototexnika, injenerlik sıyaqlı baǵdarlardı keńeytiw, jas óspirimlerde áskeriy-watansúyiwshilik ruwxın kúsheytiw wazıypaları kórsetip ótildi.
Máhálledegi jańa úylerdiń birinshi qabatlarında eki jeke menshik baqsha shólkemlestirilgen. Olardıń Nawrız aldında ashılǵanı ata-analar ushın bayramǵa tán sawǵa boldı.
Ishki imkaniyatlardı iske qosıp, xalıqtıń bántligin támiyinlew principi bul máhállede de kózge taslanǵan. 70 sawda hám xızmet kórsetiw shaqapshası, 2 óndirislik kárxanasında kópshilik xojalıǵın baqpaqta. Prezidentimizdiń biyligi menen járiyalanǵan áhmiyetli bir aylıq sheńberinde qıytaq jerden únemli paydalanıw, awıl xojalıǵı eginlerin egiw qızǵın dawam etpekte.
«Qorshaǵan ortalıqtı qorǵaw hám «jasıl ekonomika» jılında nál egip, jasıllıq jaratıw kólemi keńeydi. Paytaxtımızdıń Bektemir rayonında jáne bir baǵqa tiykar salındı.
Prezidentimiz mámleketlik shólkemler hám jámiyetshilik wákilleri menen birge bul jerde nál ekti.
Iykota, Májnuntal, Zilola, Rohat hám Iqbol máhálleleri arasındaǵı bul aymaq aldın qarawsız orın edi. Eldiń birligi menen jáne bir jasıl mákan, xalıq dem alatuǵın park payda bolmaqta. Úsh gektarlıq aymaqqa toǵay koncepciyası tiykarında úsh mıń túp terek hám puta nálleri egildi. Olardıń suwǵarılıwı hám tárbiyasına juwapkerler biriktirildi.
Máhálle belsendileri, nuranıylar hám jaslar menen qızǵın sóylesiw boldı. Mámleketimiz basshısı jámiyetshilik wákillerine usı iygilikli baslamaǵa úles qosıp atırǵanı ushın minnetdarshılıq bildirdi. Hámmeni kirip kiyatırǵan Nawrız bayramı menen qutlıqladı.
Prezidenttiń baslaması menen járiyalanǵan áhmiyetli bir aylıq sheńberinde máhállelerde diyqanshılıq hám abadanlastırıw jumısları awızbirshilik penen alıp barılmaqta.
Báhárde 125 million túp nál egiliwi mólsherlengen. Onda egislik jerlerdi durıs tańlaw, suwǵarıwdı jaqsılawǵa ayrıqsha itibar qaratılmaqta. Jańa baǵda egilgen náller mine, usı iygilikli ámeldiń dawamı boldı.
«Qorshaǵan ortalıqtı qorǵaw hám «jasıl ekonomika» jılı Mámleketlik baǵdarlamasına muwapıq, bıyıl nálshilikke qánigelesken 18 toǵay xojalıǵı shólkemlestiriledi. Olarda «ilim-joybar-ámeliyat» principi tiykarında genetikalıq selekciya jumısları kúsheytilip, plantaciyalar keńeytiledi. «Jasıl álem» platforması iske qosılıp, nállerdi onlayn satıp alıw jolǵa qoyıladı.
Elimizdiń barlıq orınlarında Nawrız áyyyamı kóterińki ruwxta kútip alınbaqta. Prezident Shavkat Mirziyoev Bektemir rayonı Rohat máhállesine barıp, bayram seyilinde de qatnastı.
Xızmet kórsetiw hám sawdaǵa qánigelesken máhállede 4 mıń xalıq jasaydı. Bántlikti támiyinlew boyınsha jańa sistemaǵa muwapıq, banklerdiń qatnasıwında máhálleniń ishki imkaniyatları payda bolmaqta. Ótken jılı júzge shamalas xalıq jumısqa jaylastırılǵan, 256sı ózin-ózi bánt etken, 13i isbilermenlik jumısın baslaǵan. Eki óndiris kárxanası, onlaǵan sawda hám turmıslıq xızmet shaqapshaları adamlarǵa qolaylıq jaratpaqta.
Prezidentimiz bul kárxanalardı kózden ótkerdi.
Máhállede kósheler abat, xojalıqlar azada. Bilimlendiriw hám medicina mákemeleri, sport maydanshaları, oqıw orayı, amfiteatr, ónermentler hám málimleme-kitapxana orayları, nuranıylar mákanı jumıs alıp barmaqta.
Mámleketimiz basshısı usı jerde shólkemlestirilgen súmelek seyilinde qatnastı, máhálle belsendileri, nuranıylar menen qızǵın sáwbetlesti. Sóylesiwde usı jılǵı rejeler, sonıń ishinde, tınıshlıq-tatıwlıqtı saqlaw, isbilermenlikti qollap-quwatlaw, jańa jumıs orınların jaratıw haqqında sóz boldı.
– Máhálleńizdegi abatlıqtı, adamlardıń keypiyatın kórip, quwandım. Waqıtı menen barlıq rayonlardaǵı imkaniyatlardı arttıramız. Onıń ushın eń tiykarǵısı – tınıshlıq-awızbirshilik kerek. Aldın shegaralarımızda jaǵday qanday edi! Qıyınshılıqqa shıdamlılıq penen, siyasiy erk-ıqrar menen barlıq máselelerge sheshim tawıp atırmız. Barlıq jumıslardı tómengi sistemada shólkemlestirgenimiz ushın 10 mıńǵa shamalas máhálleniń jaǵdayı anıq kórinbekte. «Máhálle jetiligi» arqalı xojalıqqa jetip barılmaqta. Adamlardıń dáramatın arttırıw, kámbaǵallıqtı qısqartıw, jaslardıń siyasatında ele jumıslarımız kóp. Sonıń ushın bilimlendiriwge, ul-qızlardı oqıtıwǵa úlken itibar beriwimiz kerek. Jasları bilimli hám mánawiyatlı jámiyet, álbette, abadanlıqqa erisedi,-dedi Shavkat Mirziyoev.
Rohat máhállesinde ulıwma bilimlendiriw mektebi, balalar muzıka hám kórkem óner mektebi, «Bárkamal áwlad» orayı, akademiyalıq licey jumıs alıp barmaqta. Jaqında jańa mektepke shekemgi bilimlendiriw shólkemi qurıp pitkerildi. Olar da jaslardıń aǵartıwshılıǵın arttırıwǵa xızmet etedi.
Ziyodulla JONIBEKOV,
Ikrom AVVALBOEV,
Behruz XUDOYBERDIEV,
ÓzAnıń xabarshıları