Taqıyatas rayonında máhállelerde isbilermenlik penen shuǵıllanıp atırǵan isbilermenlerdiń kórgizbesi bolıp ótti.

Onda rayon hákimi K.Aytbaev, tiyisli taraw basshıları, hákim járdemshileri qatnasıp máhállelerde qusshılıq, pal hárreshilik, gúlshilik, ónermentshilik penen shuǵıllanıp atırǵan isbilermenlerdiń jumısı, qol ónermentshilik buyımları menen tanısıp, olar menen jaqınnan sáwbetlesti.
Ilaj dawamında juwapkerler «Nayman agro teplica» ıssıxanısınıń jumısı menen jaqınnan tanısıp, onda islewshi jumısshılar menen sáwbetlesti.
Rayondaǵı Naymankól APJ aymaǵında jaylasqan «Nayman agro teplica» JShJ tárepinen 2028-jılı 3,8 million AQSh dolları investiciya esabınan Qubla Koreya texnologiyası tiykarında shólkemlestirilgen ıssıxanada 60 qa shamalas jergilikli xalıq jumıs penen támiyinlengen. Shólkemlestirilgen 8,5 gektar jer maydandaǵı ıssıxanaǵa pomidor egilip, búgingi kúnde ishki bazarǵa hám Rossiya mámleketi menen qońsılas Qazaqstan respublikasına eksporttı jolǵa qoyǵan.
Keyingi mánzil usı «Naymankól» APJ aymaǵındaǵı Sharip Allambergenovtıń ıssıxanası boldı. Ol úy qaptalındaǵı qıytaq jerinde túrli palız ónimleriniń nállerin jetistirip, jergilikli bazarlarǵa shıǵarıp satıp, shańaraǵına qosımsha dáramat tappaqta. Sonıń menen birge shańaraq aǵzaları pilleshilik penen de shuǵıllanadı.
-Mámleketimizde isbilermenler ushın keń imkaniyatlar jaratılǵan. Tek ǵana sol imkaniyatlardan nátiyjeli paydalanıp, miynet etiw kerek. Mine, bizler shańaraq aǵzalarımız benen birgelikte qıstıń kúnleri bos otırmastan úy qaptalındaǵı ıssıxanamızǵa nállerdi kógertip, onı jetistirip, bazarǵa shıǵarıp satıp, qosımsha dáramat tawıp otırmız. «Háreketke-bereket», degenindey dáramatımız jaqsı,-deydi Sh.Allambergenov.
Ilaj barısında isbilermenlerdiń iskerligin bunnan bılay da rawajlandırıw, puqaralardıń isbilermenlik penen shuǵıllanıwı ushın imkaniyatlar jaratıp beriw boyınsha basshılar tárepinen tiyisli juwapkerlerge tapsırmalar berildi.

Qaraqalpaqstan xabar agentligi