Bul haqqında Mektepke shekemgi hám mektep bilimlendiriwi ministrliginiń baspasóz xızmeti málim etti.

Ministrliktiń xabarına bola, jańa nızamshılıqqa muwapıq, mektep direktorı hám onıń orınbasarları sonday-aq, mektepke shekemgi bilimlendiriw shólkemi direktorlarınıń miynet haqı muǵdarları arttırılmaqta.
2025-jıl 1-sentyabrden baslap ulıwma orta bilimlendiriw shólkemleriniń direktorı lawazımınıń bazalıq tarif stavkası 20 procentke, orınbasarı lawazımınıń bazalıq tarif stavkası 15 procentke arttırılıp, baqshalar direktorları lawazımlarınıń bazalıq tarif stavkaları III hám IV topardaǵı ulıwma orta bilimlendiriw shólkeminiń direktorı orınbasarı lawazımınıń bazalıq tarif stavkalarına teńlestiriw arqalı arttırıladı.
Respublikamızdaǵı 10 mıńnan artıq mektep direktorları, 7 mıńǵa shamalas baqsha direktorları hám 35 mıńǵa shamalas mektep direktorı orınbasarlarınıń miynet haqı muǵdarları arttırılıwına erisiledi.
2026-jıl 1-yanvardan baslap ulıwma orta bilimlendiriw shólkemleriniń direktor qorınıń qarjıları esabınan direktor hám onıń orınbasarlarına jumıs nátiyjeliliginiń kórsetkishleri (KPI) nátiyjesine bola bazalıq tarif stavkalarına tiyislisinshe 20 hám 10 procent muǵdarında hár aylıq ústemeler belgilenedi.
Rayonlıq bólimlerde qosımsha shtatlar ajıratılmaqta hám bul oqıwshılardıń bilimin bahalawdı monitoring etiw, oqıwshılarǵa shet tilin hám kásipke úyretiw wazıypaların ámelge asırıw ushın tiyisli lawazımlardı engiziw imkaniyatın jaratadı.
Aymaqlıq bólimleri xızmetkerleriniń kóp jıllıq xızmeti ushın xoshametlew engizilmekte (Ministrlik sistemasındaǵı derlik 15 mıń basqarıw xızmetkerlerine kóp jıllıq xızmeti ushın xoshametlew sisteması jolǵa qoyıladı).
Mektep xızmetkerleri sıylıq pulı muǵdarın miynetke haqı tólewdiń eń az muǵdarınıń 75 procentine shekem (ámelde 50 procentke shekem) muǵdarında etip belgilenbekte.
Jáne bir áhmiyetli ózgeris – burınları mekteplerimizdiń bos turǵan imaratlarınıń ijarasınan túsken qarjılardıń 40 procentin ǵana sol mektepte qalatuǵın edi. Endigiden bılay bul qarjılardıń 75 procenti sol mekteptiń rawajlanıwına jumsaladı.

Muhayyo Toshqoraeva, ÓzA