Usı jıl 19-mart kúni “Ózbekstan Respublikasında xızmet kórsetken ekolog” húrmetli ataǵın shólkemlestiriw haqqındaǵı Nızam qabıl etildi.

Nızamǵa bola, “Ózbekstan Respublikasında xızmet kórsetken ekolog” húrmetli ataǵı mámleketimizde ekologiya hám qorshaǵan ortalıqtı qorǵaw tarawın rawajlandırıw, tábiyattı qásterlep saqlaw, biologiyalıq kóp túrlilikti saqlaw, klimat ózgeriwi aqıbetlerin jumsartıw, tábiyǵıy resurslardan aqılǵa uǵras paydalanıw hám olardı qayta tiklew baǵdarında salmaqlı nátiyjelerge erisken ekobelsendilerge beriledi.
Sonday-aq, ekologiyalıq jaqtan taza hám innovaciyalıq texnologiyalardı islep shıǵıwda hám ámeliyatqa engiziwde, jasıl aymaqlardı keńeytiwde hám kóklemzarlastırıw jumıslarında ayrıqsha baslama kórsetken, xalıqtıń ekologiyalıq mádeniyatın arttırıw, jas áwladtı tábiyatqa húrmet ruwxında tárbiyalaw hám sistemada joqarı maman kadrlardı tayarlaw baǵdarında pidákerlik penen miynet etip atırǵan qánige-xızmetkerlerge hám tarawdıń basqa da wákillerine sonday-aq, bul baǵdarda jámiyetlik qadaǵalawdı ámelge asırıp atırǵan ekobelsendilerge beriledi.
Nızam rásmiy járiyalanǵan kúnnen baslap kúshke kiredi – dep málimleme beredi xabar.uz saytı.

Qaraqalpaqstan xabar agentligi