Shomanay rayonında da Nawrız bayramına baǵıshlanǵan ilajlar “Qádiriyatlarıń máńgi bolsın!” súreni astında kóterińkilik ruwxında bolıp ótti.

Bayram ruwxın seziw múmkin bolǵan hár qıylı ilajlar, kewil ashar baǵdarlamalar, kórkem óner sheberleriniń shıǵıwları rayon xalqına bayram quwanıshların baǵıshlamaqta.
Ilajda rayon hákimi A.Ametov rayonnıń sociallıq-ekonomikalıq jetiskenliklerine, Prezidentimizdiń baslaması menen rayonda ámelge asırılıp atırǵan reformalarǵa toqtap ótip, qatnasıwshılardı bayram menen qızǵın qutlıqlap, jaqsı tileklerin bildirdi.
– Rayon xalqı Nawrız bayramın óziniń milliy dástúrleri menen qádiriyatların tiklew, olardı keleshek áwladlarǵa jetkeriw imkaniyatı sıpatında qabıl etpekte,-dep xabar bermekte rayon hákimliginiń baspasóz xızmeti.
Bayram ilajları dawamında rayonnıń barlıq orınlarında milliy taǵamlar tayarlanıp, ónermentshilik buyımları hám qol miyneti ónermentlishiliginiń kórgizbeleri shólkemlestirildi.
Bayramda qoshqar urısı hám at báygisi jarısları ótkerildi. Onda respublikanıń túrli rayonlarınan qoshqarpazlar qatnasıp óz-ara kúsh sınastı. Kúshli gelle qoyǵan qoshqarlar hám kim ozarǵa ketken atlar birin-biri quwıp ótip, xalıqqa ájayıp tamasha berdi.
Jeńimpazlar rayon hákimligi tárepinen sıylıqlanıp barıldı.
Álbette, bunday saltanatlı xalıq seyili, xosh keypiyat, ájayıp bayram ilajları usınday tınısh elge jarasadı. Bayram ilajları barlıq orınlarda kóterińkilik ruwxında dawam etpekte.

Qaraqalpaqstan xabar agentligi