Investiciyalar mámlekettiń ekonomikalıq jaqtan rawajlanıwında úlken áhmiyetke iye. Sońǵı jılları investiciyalardı jedel tartıwǵa itibar kúsheytilmekte.

Beruniy rayonına Qıtay Xalıq Respublikasınan bir topar investorlar keldi.
Investorlar rayon hákimi I.Xidirov penen ushırastı. Investiciya joybarların ámelge asırıw boyınsha dodalawlar alıp bardı.
Soń, olar rayon aymaǵında jaylasqan Sultan Wayis taw dizbegindegi qurılıs materiallarında qollanılatuǵın túrli mineral taslar menen tanıstı, – dep málimleme beredi Beruniy rayonı hákimligi málimleme xızmeti bólimi.
Ushırasıwda investorlar ózleriniń usınısların bildirip ótti.
Sonday-aq, Ellikqala rayonına da Qıtay Xalıq Respublikasınan bir topar investorlar keldi.
Ellikqala rayonı hákimligi málimleme xızmeti bóliminiń maǵlıwmatına bola, Rayon hákimi V.Niyazimbetov investorlar menen ushırasıp usınısların bildirip ótti. Sonday-aq, joybardı ámelge asırıw boyınsha dodalawlar alıp barıldı.
Investorlar óndiris kárxanaları hám rayonnıń turizm potencialı menen tanıstı.

Qaraqalpaqstan xabar agentligi