Mámleketimiz basshısınıń «Ishki isler uyımlarınıń jas óspirimler arasında huqıqbuzarlıqlar profilaktikasına baylanıslı jumısın jetilistiriw boyınsha qosımsha ilajlar haqqında»ǵı hám «Respublikadaǵı kriminogen jaǵdaydı kúndelikli tallaw jumısın shólkemlestiriw ilajları haqqında»ǵı qararları qabıl etildi.

Bul hújjetlerdiń orınlanıwı boyınsha Bas prokuraturada Prezident keńesgóyi D.Qodirovtıń basshılıǵında uyımlararalıq májilis bolıp ótti.
Videoselektor tárizinde ótkerilgen bul májiliste Bas prokuratura, Ishki isler ministrligi, tarawǵa juwapker ministrlikler hám uyımlardıń basshıları hám juwapker xızmetkerleri, wálayat, rayon (qala) hákimleri, prokurorlar hám ishki isler bólimleriniń baslıqları hám basqa juwapker uyımlardıń wákilleri qatnastı.
Qararlardıń mazmun-mánisi tolıq sáwlelendirilip, kriminogen jaǵdaydı kúndelikli tallaw hám mánzilli qadaǵalaw ilajların ámelge asırıw arqalı máhállelerde huqıqbuzarlıqlardıń erte aldın alıwdı támiyinlew, bul baǵdarda “máhálle kesiminde” mánzilli ilajlardıń nátiyjeliligin arttırıwdıń jańasha mexanizmleri kórsetip ótildi.
Sın kózqarasta ótkerilgen májiliste jınayatshılıq hám huqıqbuzarlıqlardıń aldın alıwda jol qoyılǵan qáte-kemshilikler anıq sanlar hám mısallarda kórsetip ótilip, aldaǵı wazıypalar belgilep alındı.
Sonıń ishinde, jınayatlardıń awırlıq dárejesi hám kategoriyasına tiykarlanıp “respublika-wálayat-rayon” principi tiykarında muwapıqlastırılıwı hám qatań qadaǵalaw sisteması jolǵa qoyılatuǵını atap ótilip, juwapkerlerge bul boyınsha anıq tapsırmalar berildi.
Bunnan tısqarı, Milliy gvardiyanıń jas óspirimler máseleleri boyınsha inspektor-psixologlar lawazımları hám 2 mıń shtat birligi Ishki isler ministrliginiń strukturasına ótkerilgeni málim etilip, ishki isler uyımları tárepinen jas óspirimler menen “Shańaraq – máhálle – mektep” principi tiykarında mánzilli islesiw baǵdarında anıq wazıypalar belgilep berildi.

ÓzA