Aldın xabar bergenimizdey, mobil tájiriybe arttırıw xızmetleri tiykarında shólkemlestirilgen avtobus respublikamızdıń alıs hám shetki aymaqlarında jaylasqan mektepke shekemgi bilimlendiriw shólkemleriniń pedagog kadrları ushın óz xızmetin basladı.

Usı arnawlı avtobus Moynaq rayonındaǵı alıs Hákim ata awıl puqaralar jıyını aymaǵında jaylasqan 15-sanlı mámleketlik mektepke shekemgi bilimlendiriw shólkemi hám «Nurmuǵambetova Mayna» shańaraqlıq mektepke shekemgi bilimlendiriw shólkemlerine barıp, bul jerdegi pedagoglarǵa ózleri jasaytuǵın hám isleytuǵın orınlarınan uzaqlaspaǵan halda úzliksiz kásiplik rawajlanıwı, bilimlerin jańalawı ushın imkaniyat jaratıldı.
Mobil qánigelik arttırıw kursında metodikalıq sheberlik kúni baǵdarlaması tiykarında temalar belgilengen, máselen “Gózzal báhár” temasında, erte jastan balalardıń súwret salıwı, súwret salıwda qollanılatuǵın usıl hám texnologiyalar haqqında túsinik beriw, “Máwsimlik ózgerisler” temasında tarawlar tiykarında maqsetlerdi belgilew, temadaǵı maqsetlerdi ámelge asırıw usılları, texnologiyaları, bilimlendiriw jumısında paydalanılatuǵın kórgizbeli hám tarqatpa qurallar, “Xalıq derekleri” temasında balalardı milliy qádiriyatlar, dástúrler tiykarında rawajlandırıwdıń nátiyjeli usılların úyretiw hám basqa da usı sıyaqlı áhmiyetli wazıypalar belgilengen.
Maǵlıwmat ushın, mobil tájiriybe arttırıw xızmetleri auditoriya kórinisindegi qayta úskenelengen avtobus negizinde shólkemlestirilgen bolıp, bul avtobus bir waqıttıń ózinde 14 pedagogqa sabaq ótiw ushın oqıw orınları, 10 NR markalı noutbuk, 1 dana 65 dyuymlı interaktiv monitor, jazıw doskası, 1 internet tarqatıwshı qurılma WI FI router menen qayta úskenelengen.
Bul avtobustan uzaq hám shetki aymaqlarda jasaytuǵın mámleketlik hám jeke menshik mektepke shekemgi bilimlendiriw shólkemleriniń pedagog kadrları ushın mobil qánigelik arttırıw xızmetlerin kórsetiw, yaǵnıy úzliksiz kásiplik rawajlandırıw (“metodikalıq sheberlik kúni” hám “metodikalıq sheberlik sabaǵı”) ilajların tiyisli aymaqlarǵa barǵan halda ótkeriw, trening, seminar hám basqa da ilajlardı shólkemlestiriw maqsetinde paydalanıladı.

Qaraqalpaqstan xabar agentligi.