Ulıstıń ullı kúni Nawrız bayramı «Qádiriyatlarıń máńgi bolsın-Nawrız» súreni astında Kegeyli rayonında da shólkemleskenlik penen, kóterińki ruwxta ótkerildi.

Bayramnıń tiykarǵı saltanatları rayonnıń oraylıq stadionında bolıp ótip, onda rayon hákimi Aybek Kamalov Nawrız bayramı menen aymaq xalqın qızǵın qutlıqlap, bul bayram ásirler dawamında saqlanıp kelgen milliy qádiriyatlarımız hám dástúrlerimizdi ózinde jámlegeni menen áhmiyetli ekenligin atap ótti.
Bayram tamashaları kórkem óner sheberleri tárepinen tayarlanǵan koncert baǵdarlaması, xalıq seyili hám milliy oyınlar jarısına ulasıp ketti.
Nawrız bayramı sheńberinde milliy kiyimler hám taǵamlar kɵrgizbesi bayram qatnasıwshılarınıń názerine usınılıp, xalqımız, ásirese, ósip kiyatırǵan jas áwlad wákilleri ata-babalarımızdan miyras bolıp kiyatırǵan salt-dástúrler hám milliyligimiz dúrdanaları menen tanıstı. Kórgizbege belsene qatnasqan mákeme, shólkem hám oqıw orınlarına rayon hákimligi atınan estelik sawǵaları tapsırıldı
Sońınan Nawrız bayramı tamashaları Iyshan qala awıl puqaralar jıyınındaǵı at shabar maydanında ótkerilgen milliy sport oyınları menen qızıqlı dawam etti.
Onda respublikamızdıń barlıq orınlarınan kelgen qatnasıwshılar kókpar oyını, túrli aylawlarǵa at jiberiw, qoraz urıstırıw sıyaqlı milliy oyınlarda bas bayraq ushın óz-ara bellesti hám jarıs jeńimpazları shólkemlestiriwshiler tárepinen múnásip túrde sıylıqlandı.
Bayram ilajına Qaraqalpaqstan Respublikası Joqarǵı Keńesiniń komitet baslıǵı B.Seytnazarov qatnastı.

Adilbay Orazov,
Qaraqalpaqstan xabar agentligi sholıwshısı.