Sonıń ishinde, kishi hám orta biznesti rawajlandırıw boyınsha sırt elli ekspertler menen úlken baǵdarlama islep shıǵıldı. Oǵan 2025-jılı barlıq derekler esabınan 10 milliard dollar ajıratıladı.

“Bıyıl kishi hám orta bizneske 120 trillion sum resurs beriledi. Bunday úlken qarjı burın hesh qashan bolmaǵan.”
– dedi mámleketimiz basshısı.
Atap aytqanda, xalıqtı isbilermenlikke tartıw ushın 22 trillion sum muǵdarında jeńilletilgen resurs ajıratıladı. Sonnan 2,5 trillion sum jaslarǵa, jáne sonshası hayal-qızlar isbilermenligi joybarları ushın qaratıladı.
Hayal-qız isbilermenlerge kredit stavkası basqalarǵa qaraǵanda 2 procent arzan boladı.
“Úy-ruwzıgershilik hám perzent tárbiyasınan artıp, isbilermenlik penen adamlardı jumıslı, dáramatlı etip atırǵan hayal-qızlarımızǵa qanshelli raxmet aytsaq, arzıydı,”
– dedi Prezident.
Bıyıldan kishi bizneske 300 million sumǵa shekem kredit beriw baslandı. Bunnan bılay bir jılda irilenip, kishi yaki orta kárxanaǵa aylanǵan isbilermenlerge sonıń 150 million sumı girewsiz beriledi.
Juwapkerlerge aldınǵı kreditinen keshikken qarızı bolmaǵan isbilermenlerge jańa jeńilletilgen kredit alıw imkaniyatın jaratıw tapsırıldı.