Úsh mıń jıldan aslam óz tariyxına iye Nawrız bayramı xalqımızdıń eń ullı bayramlarınıń biri bolıp, bul kúndi ázelden ata-babalarımız jańa jıldıń bası sıpatında kóterińki keypiyatta kútip alǵan. Ózleriniń milliy qádiriyatlarına sadıq qalǵan búgingi jas áwlad ta bıyılǵı bayramdı «Qádiriyatlarıń máńgi bolsın–Nawrız!» súreni astında keń jámiyetshiliktiń qatnasıwında belgilemekte.

Atayı shabandozlar hám palwanlar elatı bolǵan Qaraózek rayonında da Nawrız ulıwmaxalıqlıq bayramı kóterińki ruwxta ótkerildi.
Bayram saltanatında rayon hákimi Anvar Baymuratov aymaq xalqın jıl bası esaplanǵan Nawrız benen qızǵın qutlıqlap, bıyılǵı jıldıń xalqımız ushın qolaylı hám bereketli jıl bolıp keliwin tiledi.
Ulıwmaxalıqlıq seyilge aylanǵan Nawrız bayramında rayondaǵı mákeme, kárxana hám shólkemler, ónermentler tárepinen milliy taǵamlar hám buyımlar kórgizbesi, ata-babalarımızdan miyras bolıp kiyatırǵan dástúrlerimizdi sáwlelendiriwshi úrp-ádet hám salt-dástúrlerimiz kórsetilip, bul ósip kiyatırǵan jas áwladlarımız benen birge, sırt elli miymanlarda da ayrıqsha tásir qaldırdı.
Ózleriniń eń jaqsı ónerlerin kórsetken mákeme, kárxana, shólkem hám jeke ónermentler rayon hákimligi tárepinen múnásip túrde xoshametlendi.
Bayram ilajında xalqımızdıń milliy sport túrlerinen esaplanǵan gúres, tas kóteriw, arqan tartıs, qoshqar dúgistiriw hám qoraz urıstırıw boyınsha jarıslar ótkerilip, jeńimpaz bolǵan sportshılar bahalı estelik sawǵaları menen sıylıqlandı.
-Búgingi ótken gúres bellesiwlerinde Quralpa awıl puqaralar jıyınınan Abzatdin Alxanov, qızlar arasında Mehriban Qıdırbaevalar bas bayraqtı jeńip alıwǵa miyasar boldı,-deydi Kurash federaciyasınıń Qaraózek rayonlıq bólimi baslıǵı Ernazar Kamalov.
Nawrız seyili rayonlıq mádeniyat bólimi xızmetkerleri tárepinen tayarlanǵan yoshlı koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı.