2025-jıldıń 4-5-aprel kúnleri «Silk Road Samarkand» kongress orayında birinshi Samarqand klimat forumı bolıp ótedi. Forumda dúnya jetekshileri, siyasatshılar, ekspertler hám belsendilerdiń qatnasıwında Oraylıq Aziya hám dúnyada ushırasıp atırǵan áhmiyetli klimat mashqalaları dodalanadı.

«Oraylıq Aziya global klimat mashqalalarına ushıraspaqta: ulıwmalıq abadanlıq ushın birlesiw» teması astındaǵı forum ekologiyalıq turaqlılıq, «jasıl» ekonomikalıq rawajlanıw hám klimat turaqlılıǵı boyınsha sóylesiwdi ámelge asırıw ushın joqarı dárejedegi platformaǵa aylanadı.
Tiykarǵı itibar regionallıq hám xalıqaralıq birge islesiwge qaratılǵan. Klimat forumı qayta tiklenetuǵın energetikanı rawajlandırıw, suw resursların kompleksli basqarıw, biologiyalıq hár túrlilikti saqlaw hám turaqlı qalanıń rawajlanıwı sıyaqlı tiykarǵı baǵdarlar boyınsha ekspert panelleri, jalpı sessiyalar hám siyasiy sóylesiwlerdi usınadı.
Dodalawdıń tiykarǵı temalarınan biri global kólemdegi ekologiyalıq apatshılıqtıń anıq úlgisi bolǵan Aral teńizi krizisi bolıp esaplanadı. Qánigeler hám húkimet wákilleri zıyan kórgen aymaqlarda jerlerdi tiklew, shólleniwge qarsı gúresiw hám klimat ózgeriwiniń sociallıq-ekonomikalıq aqıbetlerin azaytıw boyınsha barlıq sheshimlerdi kórip shıǵadı.
Forumda Oraylıq Aziya mámleketleri, sonıń ishinde, Ózbekstan, Qazaqstan, Qırǵızstan, Tájikstan hám Túrkmenstan basshıları, sonday-aq, Evropa Awqamı, BMSh, xalıqaralıq qarjı institutları hám jetekshi ekologiya shólkemleriniń wákilleri qatnasıwı kútilmekte. Bul aymaqtıń jasıl transformaciyası hám turaqlı rawajlanıwına ulıwmalıq sadıqlıqtı tastıyıqlaydı.
Ilajdıń tiykarǵı nátiyjesi Samarqand forumınıń juwmaqlawshı hújjeti – «Jasıl» rawajlanıwdıń Regionallıq koncepciyası prezentaciyası bolıp, ol klimat ózgeriwi tarawında Oraylıq Aziya mámleketleriniń birden-bir regionallıq kóz qarasların qáliplestiriwge tiykar saladı. Onda jetekshi xalıqaralıq shólkemlerdiń regiondaǵı ekologiyalıq mashqalalardı sheshiw baǵdarındaǵı qatnasları bayan etiledi.

Muhayyo Toshqoraeva,
ÓzA