Pekin qalasınıń Tuanju rayonında jaylasqan Pekin Milliy Kitapxanası (National Library of China), Qıtaydıń eń iri hám abıraylı kitapxanalarınan biri bolıp tabıladı. Bul kitapxana Qıtaydıń bay tariyxıy hám mádeniy miyrasın úyreniw ushın úlken imkaniyatlar jaratadı.

Pekin Milliy Kitapxanası 1909-jılı shólkemlestirilgen bolıp, Qıtaydıń eń áyyemgi kitapxanalarınan biri bolıp tabıladı. Dáslep «Jingshi Biblioteka» ataması menen tanılǵan bul mákeme 1912-jılı rásmiy túrde jumısın baslaǵan. Kitapxana óziniń búgingi zamanagóy kelbetine jetip kelgenine shekem kóplegen basqıshlardı basıp ótti.
Kitapxanada 8 millionnan aslam kitap, qol jazba, hújjet, gazetalar, jurnallar hám basqa da hár qıylı materiallar bar. Ásirese, kitapxananıń tariyxıy hám áyyemgi dóretpelerdi óz ishine alǵan fondı oǵada áhmiyetli bolıp esaplanadı. Qıtay tariyxı, filosofiyası, ádebiyatı hám kórkem óneri boyınsha biybaha qol jazbalar, áyyemgi baspa kitaplar hám mámleketlik arxivler usı jerde saqlanadı.
Zamanagóy dáwir talapları tiykarında Pekin Milliy Kitapxanası sanlastırıw boyınsha úlken jumıslardı ámelge asırǵan. Kitapxananıń sanlı arxivleri paydalanıwshılar ushın elektron formatta kitap hám basqa da maǵlıwmatlardı oqıw imkaniyatın jaratadı. Internet arqalı aralıqtan paydalanıw xızmeti bolsa izertlewshiler hái kitapxanashılarǵa dúnyanıń qálegen múyeshinen maǵlıwmat alıw imkaniyatın beredi.
Kitapxananıń eń bahalı baylıqlarınan biri bul Qıtaydıń áyyemgi qoljazbaları hám baspa shıǵarmalardıń siyrek ushırasıtuǵın toplamı bolıp tabıladı. Sonıń ishinde, Siu hám Tang dinastiyalarına tiyisli biybaha tekstler, áyyemgi mámleketlik hújjetler hám filosofiyalıq shıǵarmalar usı kitapxanada jaylasqan. Kitapxana sonday-aq, Qıtaydıń eń áyyemgi bibliografiyalıq katalogların da saqlaydı.
Pekin Milliy Kitapxanası tek ǵana Qıtaydıń ishki emes, al xalıqaralıq kólemde de ilimiy birge islesiwin rawajlandırıwǵa belsene qatnasadı. Kitapxana dúnyanıń eń iri kitapxanaları menen tıǵız baylanısların jolǵa qoyǵan hám xalıqaralıq kitap almasıwları, qoljazba hám ilimiy maǵlıwmatlar boyınsha izertlewler alıp baradı.
Tuanjudaǵı Pekin Milliy Kitapxanası Qıtaydıń ilmiy hám mádeniy miyrasın saqlaw hám úgit-násiyatlawda jetekshi orın iyeleydi. Ol jerde saqlanıp atırǵan áyyemgi dóretpeler, zamanagóy sanlı resurslar hám keń kólemli imkaniyatlar kitapxananı dúnya masshtabındaǵı ilimiy orayǵa aylandıradı. Ilimiy izertlewler, mádeniyat hám bilimlendiriw tarawlarında jumıs alıp baratuǵın hár bir insan ushın bul kitapxana biybaha derek hám bilimler ǵáziynesi bolıp tabıladı.

Nozimbek Mardonov, ÓzA
Qıtay, Pekin qalasınan tayarladı