Senattıń besinshi jalpı májilisinde «Ózbekstan Respublikasınıń Evroaziya rawajlanıw bankin shólkemlestiriw haqqındaǵı Kelisimge (Astana, 2006-jıl 12-yanvar) qosılıwı haqqında»ǵı nızam kórip shıǵıldı.

Kelisimniń tiykarǵı maqseti investiciya jumısı arqalı oǵan qosılǵan qatnasıwshı mámleketlerdiń ekonomikalıq ósiwine hám olardıń arasındaǵı sawda-ekonomikalıq qatnasıqlardı keńeytiwge járdem beriw bolıp esaplanadı.
– Usı hújjetke bola, bul bank óz jumısın xalıqaralıq shártnamalar, xalıqaralıq huqıq, ulıwma tán alınǵan bank jumısınıń principleri hám normalarına muwapıq ámelge asırıwı, sonday-aq, Bank rejesi bul Kelisimge qosımsha etilgen halda tastıyıqlanıwı názerde tutılǵan – dedi Senattıń Xalıqaralıq qatnasıqlar, sırtqı ekonomikalıq baylanıslar , sırt el investiciyaları hám turizm máseleleri komiteti baslıǵınıń orınbasarı Odiljon Mamatkarimov. – Sonday-aq, Bank rejesinde Evroaziya rawajlanıw bankiniń jumısı, maqset hám wazıypaları, funkciyaları, jeńillikleri, ustav kapitalı hám oǵan jazılıw shártleri hám Bank basqarıwına baylanıslı tártip-qaǵıydalar belgilengen.
Bunnan tısqarı, Evroaziya rawajlanıw bankine qatnasıwshı mámleketlerdiń ekonomikası hám finanslıq bazarlarınıń jaǵdayı, olardıń investiciya imkaniyatları, pul-kredit hám valyuta aylanısı, bank hám valyutanı tártipke salıw tarawındaǵı nızamshılıq normaları haqqındaǵı maǵlıwmatlardı toplawı, sistemalastırıwı hám tallawı belgilenbekte.
Senatorlar maqullaǵan nızam Ózbekstannıń Evroaziya rawajlanıw bankine aǵza bolıwı ushın huqıqıy tiykar jaratadı.
Bank jumısı sheńberinde tolıq hám nátiyjeli qatnasıw huqıqıy támiyinlenedi, Sonday-aq, Bankke aǵza mámleketlerdiń ekonomikalıq ósiwine járdem beriw, sawda-ekonomikalıq qatnasıqlardı keńeytiw hám investiciya jumısı arqalı Evroaziya aymaǵında integraciya processlerin rawajlandırıwǵa xızmet etedi.

N.Abduraimova, N.Haydarov (súwret), ÓzA