Házirgi kúnleri elimizdiń awıl-aymaqlarında xalqımızdıń milliy bayramı esaplanǵan Nawrız keń túrde belgilenbekte. Tábiyattıń oyanıw hám jasarıw pasılı esaplanǵan báhárde ótkeriletuǵın bul bayram seyilleri aymaq turǵınlarınıń awızbirshiligi hám óz-ara doslıǵın kórsetedi.

Shımbay rayonı Tazǵara awıl puqaralar jıyınında da Nawrız tamashaları keń jámiyetshiliktiń qatnasıwında kóterińki keypiyatta belgilendi.
Ulıwmaxalıqlıq bayram saltanatında Qaraqalpaqstan Respublikası Joqarǵı Keńesiniń Apparat baslıǵı J. Idiyatullaev, «Wzsanoatqurilishbank» AKB baslıǵı orınbasarı Sh. Yakupov hám basqalar aymaq xalqın Nawrız bayramı menen qızǵın qutlıqlap, olarǵa ózleriniń iygilikli tileklerin bildirdi.
Elat xalqın úlken quwanıshqa bólegen bayramda milliy kiyimler, buyımlar hám taǵamlar kórgizbesi shólkemlestirilip, shúlen qazanlarda súmelek hám nawrızlıq gójeler tayarlandı.
-Elatımızda búgingi kúni bes mıńnan aslam xalqı tınısh-tatıw jasamaqta,-deydi Tazǵara awıl puqaralar jıyını aqsaqalı Sadıq Ibrayımov.-Sońǵı jılları aymaǵımızda Ózbekstan Respublikası Prezidenti hám Qaraqalpaqstan Respublikasi Joqarǵı Keńesiniń arnawlı qararları tiykarında kóplegen unamlı isler ámelge asırıldı. Atap aytqanda, ótken jılı jıyın keńsesi imaratı jańadan qurıp berilip, shańaraqlıq poliklinikamızǵa kapital ońlaw jumısları júrgizildi. Ishki jollarǵa shaǵıl taslar tóselip, awıl xalqına kóplegen qolaylı sharayatlar jaratıldı. Bunıń ushın Prezidentimizge, elimiz basshılarına tereń minnetdarshılıq bildiremen. Pursattan paydalanıp, pútkil xalqımızdı Nawrız ulıwmaxalıqlıq bayramı menen qutlıqlayman. Ilayım elimiz tınısh, bunnan da abadan bola bersin!
Házirgi kúnleri rayonnıń barlıq aymaqlarında Nawrız seyilleri bolıp ótpekte.

Adilbay Orazov,
Qaraqalpaqstan xabar agentligi sholıwshısı