Bryussel qalasında Evropa awqamınıń Ekonomikalıq hám sociallıq komiteti tárepinen «Puqaralıq jámiyeti hápteligi – 2025» xalıqaralıq ilajı ótkerilmekte. Bul abıraylı háptelikte Ózbekstan puqaralıq jámiyeti delegaciyası, sonıń ishinde, «Rawajlanıw strategiyası» orayınıń wákilleri qatnaspaqta.

Xalıqaralıq ilaj inklyuzivlik, demokratiyalıq qatnasıq hám birge islesiwdi rawajlandırıw sıyaqlı áhmiyetli máselelerge baǵıshlanıp, global kólemde puqaralıq jámiyetiniń ornı hám roli, innovaciyalıq processler hám aldınǵı tájiriybelerdi dodalaw ushın áhmiyetli maydanǵa aylanbaqta.
Ilaj sheńberinde Evropanıń barlıq mámleketlerinen jetekshi puqaralıq jámiyeti institutlarınıń wákilleri, Evropa Awqamınıń tiyisli uyımları hám aǵza mámleketler húkimetleriniń wákilleri, izertlewshiler, ǵalaba xabar quralları hám xalıqaralıq shólkemlerdiń qánigeleri qatnspaqta. Olar jámiyettiń túrli qatlamların tartqan halda, puqaralıq jámiyetiniń rawajlanıwı, demokratiyalıq institutlardı bekkemlew hám puqaralardıń siyasiy processlerdegi qatnasıǵın arttırıw baǵdarlarında tájiriybe almaspaqta, delinedi «Rawajlanıw strategiyası» orayı maǵlıwmatında.
Usı xalıqaralıq ilajǵa Ózbekstan puqaralıq jámiyeti delegaciyası da mirát etilgen bolıp, qatnasıwshılar mámleketlik emes kommerciyalıq emes shólkemler hám basqa da puqaralıq jámiyeti institutlarınıń jumısın jáne de jetistiriw, aldınǵı sırt el tájiriybesin úyreniw hám óz-ara birge islesiwdi kúsheytiw imkaniyatların dodalamaqta. Sonıń ishinde, delegaciya Ózbekstanda ámelge asırılıp atırǵan demokratyalıq reformalar, puqaralıq jámiyetiniń bekkemleniwi hám inklyuziv jámiyet qurıw baǵdarındaǵı jetiskenlikler, sonday-aq, aǵımdaǵı mashqalalar hám keleshektegi tiykarǵı wazıypalar haqqında xalıqaralıq jámiyetshilik penen pikir alıspaqta.
Ilaj dawamında Ózbekstan delegaciyası sırt el ekspertleri menen tájiriybe almasıw, birgeliktegi joybarlardı ámelge asırıw, sonday-aq, puqaralıq jámiyetiniń rolin arttırıwǵa qaratılǵan innovaciyalıq baslamalardı alǵa qoyıw imkaniyatına iye bolmaqta.

A.Rustamov, ÓzA