Tıǵılıslıq máselesi xalıq ushın eń áhmiyetli máselelerden birine aylandı. Keyingi 2-3 jılda Tashkent qalasında 7-9 ballı tıǵılıslar hár kúni baqlanıp atırǵan bolsa, ayırım waqıtlarda bul jaǵday 10 ballǵa shekem kóterilmekte.

Senat jalpı májlisinde kórip shıǵılǵan «Ózbekstan Respublikasınıń Hákimshilik juwapkershilik haqqındaǵı kodeksine jollarda háreketleniw qáwipsizligin támiyinlewge hám jámiyetlik transporttan paydalanıwdıń nátiyjeliligin arttırıwǵa qaratılǵan ózgerisler hám qosımshalar kirgiziw haqkında»ǵı nızam usı sıyaqlı mashqalalardıń aldın alıwǵa qaratılǵan.
– Jollarda tıǵılıstı azaytıw hám xalıqqa qolaylılıqlar jaratıw maqsetinde jámiyetlik transportqa ústemlik beriw baǵdarında ámeliy ilajlar kórilmekte, – dedi Senattıń qorǵanıw hám qáwipsizlik máseleleri komitetiniń baslıǵı Qutbiddin Burxanov. – Atap aytqanda, Tashkent qalasında avtobuslardıń sanı keyingi 2 jılda 2 esege arttı. Olar ushın óz aldına jollar qoyılıwı nátiyjesinde avtobuslardıń qatnawındaǵı aralıq intervalı 2 esege qısqardı. Jolawshılar sanı 2 esege ósip, kúndelikli paydalanıwshılardıń sanı 1 million jolawshıǵa jetti. Biraq, nızamshılıqtaǵı boslıqlar jámiyetlik transporttan paydalanıw nátiyjeliliginiń aytarlıqtay tómenlewi, qatnawdıń turaqlılıǵı hám jámiyetlik transporttıń erkin háreketleniwine unamsız tásir etpekte.
Qalalıq avtomobil jollarında jámiyetlik transport ushın óz aldına jollar ajıratılıp, basqa transport qurallarınıń háreketi qadaǵan etilgen bolsa da, olardıń usı jolda háreketleniwi dawam etpekte.
Ámeldegi nızamshılıqta jámiyetlik transport ushın óz aldına ajıratılǵan jollarda háreketlengen transport quralı aydawshılarına juwapkershilik sharaları názerde tutılmaǵan.
Sonıń menen birge, aydawshılardıń transport quralın velosiped jolları, totuarlar hám jasıl aymaq maydanlarda basqarıwı baqlanbaqta hám bul aymaqlarda háreket qatnasıwshılarınıń qáwipsizligin isenimli támiyinlewge unamsız tásir etpekte.
Jollarda háreketleniw qáwipsizligin támiyinlewge unamsız tásir etetuǵın faktorlardan jáne biri – nızamsız túrde jasalma tosqınlıqlardı ornatıw, joldı tosıp qoyıw jaǵdayı bolıp tabıladı.
Puqaralar ózi jasaytuǵın aymaqlardaǵı kóshelerde nızamsız túrde jasalma tosqınlıqlar ornatıwı, joldı tosıp qoyıw arqalı háreketleniwdi sheklegen halda xalıqqa qıstawlı xızmet kórsetetuǵın jáne arnawlı transport qurallarınıń háreketine tosqınlıq etpekte.
Usı baǵdardaǵı mashqalalardı sheshiw maqsetinde islep shıǵılǵan bul nızam menen Hákimshilik juwapkershilik haqqındaǵı kodekske jańa 128-7-statya kirgizilip, jámiyetli transport ushın óz aldına ajıratılǵan jol bóleklerinde háreketleniw qaǵıydaların buzǵanı ushın juwapkershilik belgilenbekte.
Sonıń ishinde, jónelisli transport qurallarınıń háreketleniwi – bazalıq esaplaw muǵdarınıń bir esesi muǵdarında, áne usınday huqıqbuzarlıqtı hákimshilik jaza qollanılǵannan keyin bir jıl dawamında qaytadan islese – bazalıq esaplaw muǵdarınıń úsh esesi muǵdarında járiyma salıwǵa sebep bolatuǵını belgilenbekte.
Sonıń menen birge, nızam menen Hákmshilik juwapkershilik haqqındaǵı kodekstiń 128-statyasınıń ataması hám birinshi bólimi dispoziciyası jańa redakciyada jazılmaqta.
Endi aydawshılardıń transport quralların trotuarlardan, piyadalar hám velosiped jollarınan, jasıl maydanlardan júrgiziwi, jol belgileri hám jol háreketiniń basqa da qaǵıydaları talaplarına ámel etilmegeni ushın juwapkershilik belgilenbekte.
Senatorlar maqullaǵan nızam jol háreketi qáwipsizligin támiyinlewge, jol-transport hádiyseleriniń aldın alıwǵa, jollarda jámiyetlik transporttıń háreketleniwi ushın qosımsha qolaylıqlar jaratılıwına xızmet etedi.

N.Abduraimova, ÓzA