Ózbekstan Respublikası Ministrler Kabineti «Kámbaǵallıqtı qısqartıw mámleketlik maqsetli qorı jumısın shólkemlestiriw ilajları haqqında» qarar qabıl etti.

Oǵan muwapıq:
Kámbaǵallıqtı qısqartıw mámleketlik maqsetli qorı haqqındaǵı reje;
Kámbaǵallıqtı qısqartıw mámleketlik maqsetli qorınıń Atqarıwshı direkciyasınıń strukturası;
Kámbaǵallıqtı qısqartıw mámleketlik maqsetli qorınıń qarjıları esabınan subsidiya, grant hám ssudalar ajıratıw táribi haqqındaǵı reje tastıyıqlandı.
Usı qararǵa muwapıq, Qor Jámiyetlik isler qorı, Ónermentshilik hám úy- ruwzıgershilikti qollap-quwatlaw qorı hám Xalıqtı isbilermenlikke tartıw qorınıń huqıqları hám minnetleri hám shártnamalar, sonıń ishinde, xalıqaralıq shártnamalar boyınsha huqıqıy miyrasqorı esaplanadı.
2025-jıl 1-oktyabrden baslap Qor qarjıları esabınan puqaralarǵa naq pul túrinde beriletuǵın subsidiya, grant hám ssudalar basqıshpa-basqısh sociallıq karta arqalı usınıs etiledi.
Qordıń Atqarıwshı direktorı hám onıń orınbasarı Qordıń qáwenderlik keńesi tárepinen lawazımına tayınlanadı hám lawazımnan bosatıladı. Qordıń xızmetkerleri Qordıń atqarıwshı direktorı tárepinen jumısqa qabıl etiledi hám jumıstan bosatıladı.
Qordıń Atqarıwshı direktorınıń statusı, medicinalıq, transport hám turmıslıq támiynat sharayatları, sonday-aq, Qor xızmetkerleriniń miynetke haqı tólew razryadları Qordıń qáwenderlik keńesi tárepinen belgilenedi.
Qordıń tiykarǵı maqseti, «Kámbaǵal shańaraqlar reestri»ne kirgizilgen shańaraq aǵzalarınıń bántligin xoshametlew hám isbilermenlikke tartıwǵa járdem beriw ushın bul shaxslarǵa hám olardıń bántligin támiyinlewge járdem beretuǵın yuridikalıq hám fizikalıq táreplerge subsidiya, grant hám ssudalar ajıratıw esaplanadı.

ÓzA