Senattıń besinshi jalpı májilisinde Prezidentimiz Shavkat Mirziyoev tárepinen Korrupciyaǵa qarsı gúresiw milliy keńesi májilisinde belgilep berilgen tiykarǵı baǵdarlar, Senat hám xalıq deputatları jergilikli keńesleri aldına qoyılǵan áhmiyetli wazıypalarǵa ayrıqsha itibar qaratıldı.

Senat Baslıǵı Tanzila Norboevanıń atap ótiwinshe, mámleketimiz basshısınıń parlamentke kelip jámiyetlik hám mámleketlik turmıstıń eń áhmiyetli máselelerinen biri bolǵan korrupciyaǵa qarsı gúresiwge pútkil jámiyetshiliktiń itibarın qaratqanınan sonı ańlaw múmkin, haqıyqatında da bul, ulıwma milliy másele bolıp esaplanadı.
Tarawǵa baylanıslı huqıqıy tiykar bekkemlendi, shólkemlestiriw-institucionallıq sistema jaratıldı. Mámleketimiz tariyxında birinshi márte korrupciyaǵa qarsı gúresiw, mápler soqlıǵısıwı, mámleketlik puqaralıq xızmeti, mámleketlik satıp alıwlarǵa baylanıslı bir pútin nızamlar qabıl etildi.
Korrupciyaǵa qarsı gúresiw milliy keńesi hám onıń aymaqlıq strukturaları, parlament palatalarında qánigelesken komitetler shólkemlestirildi.
Óz jumısında tek ǵana mámleket basshısına boysınatuǵın hám parlament aldında esap beretuǵın óz aldına Korrupciyaǵa qarsı gúresiw agentligi shólkemlestirildi. Ámeldegi normativlik-huqıqıy hújjetler menen birge olardıń joybarların da korrupciyaǵa qarsı ekspertizadan ótkeriw institutı engizildi. Ashıq-aydınlıq principleri hár bir tarawda tiykarǵı etip belgilendi.
Mámleketlik uyımlar hám shólkemler, sonıń ishinde, banklerde korrupciyaǵa qarsı ishki qadaǵalaw strukturaları (“komplaens-qadaǵalaw”) jumısı jolǵa qoyıldı. Taraw hám tarmaqlarda, ásirese, mámleketlik xızmetlerdi kórsetiwde insan faktorın azaytıwǵa qaratılǵan keń kólemli sanlastırıw processleri ámelge asırıldı hám bul izbe-izlik penen dawam ettirilmekte.
– Korrupciyaǵa qarsı gúresiw tarawında alıp barılǵan jumıslar hám erisilgen unamlı nátiyjeler haqqında jáne uzaq aytıw múmkin, – dedi T.Norboeva. – Biraq búgin bul illetke qarsı gúresiw boyınsha jáne de qatań, jáne de nátiyjeli, jáne de sistemalı hám jáne de isenimli ilajlar kóriwdi dáwirdiń ózi aldımızǵa qoymaqta. Sebebi, korrupciyaǵa qarsı gúresiw – turaqlı process. Bunı Prezidentimiz de ayrıqsha atap ótip, aldımızda turǵan wazıypalardı anıq hám ápiwayı etip túsindirip berdi. Endi hámmemiz – parlament, húkimet, jergilikli keńesler, jámiyetlik shólkemler hám ǴXQ bir bolıp, belgilep berilgen wazıypalardı óz waqtında hám sapalı ámelge asırıwımız, biypárwa bolmastan jedel hám intakerlikti kúsheytiwimiz zárúr.

ÓzA