Qaraózek rayonda «Jasıl mákan» ulıwma milliy joybarı sheńberinde «Bizden keleshek áwladqa jasıl mákan, jasıl baǵ qalıwına belsene qatnasayıq!» súreni astında kóklemzarlastırıw jumıslarına baǵıshlanǵan kórgizbeli seminar bolıp ótti.

Seminarǵa rayon basshıları, máhálle jetiligi, toǵay xojalıǵı qánigeleri menen aymaq turǵınları qatnastı.
Seminar dawamında qatnasıwshılar mámleketlik toǵay xojalıǵınıń nálxanasındaǵı islenip atırǵan jumıslar menen tanısıp, sayamanlı hám miyweli terek nállerin egiw boyınsha arnawlı qánigelerdiń bahalı keńeslerin tıńladı.
Ilajda qatnasıwshılar tárepinen qánigelerge sorawlar berilip olarǵa tiyisli juwaplar aldı hám jańadan ózlestirilgen jer maydanına 200 túpten aslam terek nállerin ekti.
Bunnan soń seminar qatnasıwshıları Qaraózek posyolkalıq puqaralar jıyınında jasawshı Orazalı Sarsenbaev basqarǵan «Jáhángir Qállibek » jeke menshik agrofirmasındaǵı diyqanshılıq túrleri, qoyanshılıq penen bir qatarda aq terek jetistiriw sırları menen tanısıp, óz-ara tájiriybe almastı.
Sonday-aq, ilaj qatnasıwshıları Mádeniyat awıl puqaralar jıyını aymaǵında Sayxunabad tájiriybesi tiykarında óziniń qıytaq jerinen nátiyjeli paydalanıp, óz ıssıxanasında pomidor hám basqa da náller jetistiriwdi jolǵa qoyǵan «Dwstlik» ordeniniń iyesi Genjemurat Turdımuratovtıń shańaraǵında boldı hám qıytaq jerden nátiyjeli paydalanıwdıń utımlı usılların úyrendi.

Adilbay Orazov,
Qaraqalpaqstan xabar agentligi sholıwshısı.