11-16-mart kúnleri Namangan wálayatında basketbol boyınsha qızlar arasında Universiada-2024 jarısınıń juwmaqlawshı basqıshı bolıp ótti.

Jarısqa mámleketimizdiń barlıq aymaqlarınan 14 komanda qatnasıp, jeńimpazlıq ushın óz-ara gúres alıp bardı.
Oǵada qızıqlı ótken jarıstıń topar oyınlarında Qashqadárya hám Sırdárya wálayatı komandaların iri esaplarda jeńip shıqqan qaraqalpaqstanlı qızlar, sherek finalda Jizzaq, yarım finalda Ferǵana wálayatı komandaların ústinen ájayıp túrde jeńiske eristi.
Al, chempionlıq ushın bolıp ótken sheshiwshi oyında bolsa, komandamız qızları maydan iyeleri esaplanǵan Namangan wálayatı komandasına 51-56 esabında jeńilip qaldı.
-Komandamız ushın eń qıyın bellesiw yarım finalda Ferǵana wálayatı komandası menen oyında boldı dep ayta alaman,-deydi komandanıń bas treneri Alima Jiyemuratova.- Sebebi, bizler ushırasıwdıń eń sońǵı sekundlarında 3 upaylıq esap penen óz qarsılaslarımızdı jeńip shıǵıwǵa miyasar boldıq. Oyın 50-47 esabı menen juwmaqlandı. Álbette, bul jeńis óz-ózinen bolǵanı joq. Bunda birinshi gezekte bizlerdi hár tárepleme qollap-quwatlaǵan Berdaq atındaǵı Qaraqalpaq mámleketlik universiteti rektorı Axmed Reymov, dene tárbiyası fakulteti dekanı Niyetbay Qayıpov, kafedra baslıǵı Ilal Najimov, nuranıy ustaz Allayar Kazakovlardıń salmaqlı úlesi bar. Bunıń ushın olarǵa ayrıqsha raxmet aytaman. Sonı ayrıqsha aytıp ótiwimiz kerek, usı jarıstan soń biziń komandamızdıń 6 oyınshısı Ózbekstan milliy saylandı komandası quramına shaqırılıp, házirgi waqıtta Angren qalasında shınıǵıw alıp barmaqta.
Pursattan paydalanıp, barlıq xalqımızdı elimizge kirip kiyatırǵan Nawrız bayramı menen shın kewilden qutlıqlayman hám komandamızdıń jeńisin bayram sawǵası sıpatında qabıl etiwin sorayman.
Haqıyqatında, qızlarımızdıń erisken bul tabısı, barlıq sport jankúyerlerin sheksiz quwanıshqa bóledi desek, asıra aytpaǵan bolamız. Gúlmiyra Qudiyarova, Amangúl Jollıbaeva, Gúlzat Alpısbaeva, Qońırsha Nurlıbaeva, Gúlnaz hám Dilnaz Mambetnazarovaday qızlarımızdıń Ózbekstan saylandı komandasına aǵza sıpatında shaqırılıwı, komandamızdıń erteńgi kúnge degen isenimin bekkemleydi.

Adilbay Orazov,
Qaraqalpaqstan xabar agentligi sholıwshısı