Pakistan Islam Respublikası Bas ministri Muhammad Shahbaz Sharif Ózbekstan Respublikası elshisi Alisher Twxtaevtı qabılladı.

Pakistan Bas ministri Ózbekstan Respublikası Prezidenti Shavkat Mirziyoevqa óziniń jalınlı sálemin jetkeriwdi soradı hám Tashkentke ámelge asırılǵan sapar barısında ózi hám delegaciyasına kórsetilgen miymandoslıq ushın tereń minnetdarshılıq bildirdi.
PIR Húkimet basshısı sapar etiw sheńberinde eki mámleket arasında joqarı dárejedegi jetiskenliklerge erisilgeni, óz-ara qatnasıqlar jańa basqıshqa alıp shıǵılǵanı, sonıń ishinde, joqarı dárejedegi Strategiyalıq sheriklik keńesi dúzilgeni, hár qıylı tarawlarda bir qatar áhmiyetli kelisim hám memorandumlarǵa qol qoyılǵanın úlken qanaatlanıwshılıq penen atap ótti.
Bas ministr Sh.Sharif Tashkentten qaytqannan soń, tiyisli taraw ministrlerine joqarı dárejede erisilgen kelisimlerdiń óz waqtında orınlanıwın támiyinlew boyınsha tapsırma bergenin bildirdi.
Ekonomikalıq diplomatiya baǵdarındaǵı birge islesiwdi jedellestiriw, sawda-ekonomikalıq birge islesiwdi rawajlandırıwdıń tiykarǵı baǵdarların anıq belgilep alıw, eki tárepleme sawdanı keskin arttırıw zárúrligine itibar qaratıldı. Pakistan bas ministri óz-ara tovar almasıwdıń kólemin 2 milliard dollarǵa jetkeriw boyınsha «Jol kartası»n islep shıǵıw zárúrligin atap ótti.
Sanaat kooperaciyası hám investiciyalıq birge islesiw máseleleri de ayrıqsha kórip shıǵıldı. Avtomobil qurılısı, taw-kán sanaatı, málimleme texnologiyaları, qayta tiklenetuǵın energetika, qurılıs materialların islep shıǵıw, infrastrukturalıq obektlerdi birgelikte qurıw tarawlarında birgeliktegi joybarlardı ámelge asırıw óz¬-ara birge islesiwdiń jańa baǵdarları sıpatında kórsetip ótildi.
Eki mámleket isbilermenleri arasında tikkeley sóylesiw platformasın qáliplestiriw, bankleraralıq operaciyalardı bunnan bılay da ápiwayılastırıw, turaqlı tiykarda biznes-forumlar hám aymaqlararalıq birge islesiw ilajların ótkeriwdiń zárúrligi ayrıqsha atap ótildi.
Transawǵan temir jolı qurılısın jedellestiriw, óz-ara aviaqatnawlar sanın arttırıw hám párwazlar geografiyasın keńeytiw, turizm hám mádeniy ilajlardı shólkemlestiriw regionallıq baylanıslılıq baslamasın turmısqa engiziwdiń úzliksiz bólegi bolıp esaplanatuǵınına itibar berildi.

ÓzA