Mámleketimizde suw resurslarınan nátiyjeli paydalanıw, suwdı únemlewshi texnologiyalardı engiziw, suwǵarılatuǵın jerlerdiń meliorativlik jaǵdayın jaqsılaw boyınsha sistemalı ilajlar ámelge asırılmaqta.

Tarawda alıp barılıp atırǵan reformalar nátiyjesinde ótken ásirdiń 90-jıllarına qaraǵanda suwdan paydalanıw jılına 64 milliard metr kubtan házirgi kúnde ortasha 51 milliard metr kubqa shekem azayǵan.
Bul Senattıń jalpı májilisinde «Ózbekstan Respublikasınıń Suw kodeksin tastıyıqlaw haqqında»ǵı nızamdı dodalaw procesinde atap ótildi.
Biraq izbe-iz reformalar hám júz bergen túpkilikli ózgerisler, jańa rawajlanıw strategiyasın qáliplestiriw hám suw qatnasıqlarınıń sociallıq-ekonomikalıq tiykarlarınıń ózgeriwi suwǵa baylanıslı nızamshılıqtı qayta kórip shıǵıw zárúrligin payda etken.
Bul másele boyınsha bayanat jasaǵan Senattıń Agrar, suw xojalıǵı máseleleri hám ekologiya komitetiniń baslıǵı Anvar Twychichev nızam menen tastıyıqlanıp atırǵan Suw kodeksinde suw qatnasıqları tarawındaǵı tiykarǵı huqıqıy hújjetlerdiń sistemalastırılǵanın atap ótti.
Sonıń ishinde, suwǵa baylanıslı qatnasıqlardı tártipke salıw tarawındaǵı Ministrler Kabineti, ministrlik hám uyımlar, jergilikli mámleketlik hákimiyat uyımlarınıń wákillikleri, wazıypaları hám funkciyalarına anıqlıq kirgizilmekte.
Sonday-aq, suw xojalıǵında mámleketlik-jeke menshik sheriklik mexanizmlerin engiziw shártleri, suw alıw tártibin buzǵanı ushın juwapkershilik máseleleri, suwǵa baylanıslı qatnasıqlarda xalıqaralıq birge islesiwdiń tiykarǵa baǵdarları belgilep berilmekte.
Suw kodeksiniń qabıl etiliwi suwdan aqılǵa uǵras paydalanıw, suw resursların nátiyjeli basqarıw hám qorǵawdı támiyinleydi. Taraw boyınsha mámleketlik uyımlardıń bir-birin tákirarlawshı wákillikleri menen baylanıslı máseleler sheshiledi. Suw jetkerip beriwshiler hám tutınıwshılardıń juwapkershiligi artadı.
Sonday-aq, nızam mámlekettiń suw qáwipsizligine erisiwine xızmet etedi. Onda suw tamtarıslıǵı kúsheyip baratırǵan dáwirde barlıq ekonomika tarmaqları hám qorshaǵan ortalıqtıń suwǵa bolǵan talabın qanaatlandırıw, suw resurslarınan aqılǵa uǵras paydalanıw, suw infrastrukturası hám suwǵarılatuǵın jerlerdiń jaǵdayın jaqsılaw sıyaqlı máseleler qamtıp alınǵan.
Bunnan tısqarı, suw xojalıǵın uzaq múddetli rawajlandırıwdıń huqıqıy tiykarları jaratılıp, suw resurslarınan paydalanıw nátiyjeliligin arttırıw, tarawǵa investiciyalardı tartıw hám texnologiyalıq modernizaciyalaw qollap-quwatlanadı.
Senatorlar maqullaǵan nızam xalıqaralıq suw huqıqı normaların milliy suw nızamshılıǵına sińdiriw hám Ózbekstannıń xalıqaralıq maydandaǵı imidjin jaqsılawǵa xızmet etedi.

N.Abduraimova,
N.Haydarov (súwret), ÓzA