«Turaq jay hám imarat-qurılmalardı ıssılıq energiyası menen támiyinlew tarawın túp-tiykarınan reformalaw hám imaratlardıń energiya nátiyjeliligin arttırıw ilajları haqqında»ǵı Prezident qararı qabıl etildi.

Qararǵa muwapıq, turaq jay hám imaratlardı ıssılıq energiyası menen turaqlı támiyinlew hám imaratlardıń energiya nátiyjeliligin arttırıwdıń kelesi 5 jıldaǵı tiykarǵı baǵdarları etip tómendegiler belgilendi, sonıń ishinde:
– tarawda birden-bir mámleketlik siyasattı júrgiziw, aldınǵı sırt el tájiriybeleri tiykarında strategiyalıq usınıslardı islep shıǵıw, ıssılıq támiynatı kárxanalarınıń jumısın basqarıwshı hám muwapıqlastırıwshı shólkem shólkemlestiriw;
– oraylasqan ıssılıq támiynatına qosılmaǵan tórt hám onnan joqarı qabatlı kóp kvartiralı turaq jaylardıń ısıtıw sistemasında lokal qazanxanalar qurıw hám basqa alternativ texnologiyalardı engiziw esabınan bir shańaraqtıń gazge bolǵan talabın keminde 20 procentke azaytıw.
Tómendegi ilajlar ámelge asırıladı, sonıń ishinde:
– oraylasqan ıssılıq sistemalarındaǵı eskirgen 103 qazanxana hám 1,6 mıń kilometr ıssılıq tarmaǵı jańalanadı;
– mámleketlik-jeke menshik sheriklik tiykarında 9, xalıqaralıq qarjı institutlarınıń qatnasıwında 13 qala hám rayonda modernizaciya joybarları ámelge asırıladı;
– oraylasqan ıssılıq támiyinatınıń qamtıp alınıwı 37 procentten 58 procentke shekem jekteriledi, sistemadaǵı shıǵınlar 38 procentten 20 procentke shekem qısqartıladı.
Qararqa muwapıq, Qurılıs hám turaq jay kommunallıq xojalıǵı ministrligi janında «Íssılıqtámiynatı» AJ shólkemlestiriw hám ministrlikke ıssılıq támiynatı tarawında birden-bir mámleketlik siyasattı júrgiziw júklenedi.
2025-jıl 1-iyunnen:
– qarjılandırıw dáreklerine qaramastan qurılısta texnikalıq shártler alınıwı talap etiletuǵın imarat-qurılmalardı qurıw hám rekonstrukciyalawdı joybarlastırıwda bul obektlerdiń joybar hújjetlerinde imaratlardıń óz mútájlikleri ushın qayta tiklenetuǵın energiya dárekleri qurılmaları hám alternativ ıssılıq sistemaları hám energiya únemleytuǵın úskenelerdi májbúriy ornatıw talabı kirgiziledi;
– kóp kvartiralı turaq jaylar hám imaratlardıń ishki ıssılıq hám ıssı suw tarqatıwshı sistemalarınıń qurılısı, kompleksler hám tarmaqlarda esaplaǵıshlardıń tolıq ornatılıwı májbúriy esaplanadı;
– oraylasqan ıssılıq támiynatı bar aymaqlarda jańadan qurılıp atırǵan kóp kvartiralı turaq jaylar, hákimshilik imaratlar, sociallıq taraw mákemeleri, sanaat hám isbilermenlik subektleri imarat hám kompleksleriniń ıssılıq tarmaqlarına qosılıwı májbúriy esaplanadı.

ÓzA