Shaxslardıń súwretke bolǵan huqıqların bekkemlewge qaratılǵan nızam joybarı jámiyetshiliktiń dodalawına qoyıldı.

Puqaralıq kodeksine bola, shaxslardıń súwrekte bolǵan huqıqına qol qatılmaydı. Soǵan qaramastan, bul huqıqtı támiyinlew baǵdarında nızamshılıqta boslıqlar bar.
Insannıń súwretke bolǵan huqıqın bekkemlew maqsetinde Ádillik ministrligi tárepinen milliy huqıqtı qollanıw ámeliyatı hám 30 ǵa shamalas sırt mámleketlerdiń tájiriybesi tallandı.
Tiyisli nızam joybarı islep shıǵıldı hám xalıqtıń pikirin úyreniw maqsetinde jámiyetshiliktiń dodalawına jaylastırıldı.
Joybarǵa bola, endi ulıwma qaǵıyda túrinde, hár qanday adamdı foto yamasa videoǵa alıw yamasa sol súwretten paydalanıw ushın onıń kelisimi talap etiledi.
Sonıń menen birge, joybarǵa bola, 16 jastan baslap jas óspirimler olardı súwretke alıw, súwretten paydalanıw ushın erkin kelisim bere aladı. Jámiyetlik orınlarda hám ǵalaba ilajlarda súwretke alıw ushın ruqsat talap etilmeydi.
Mámleketlik xızmetkerlerdi xızmet wazıypası waqtında sheklewsiz súwretke alıw hám sol súwretten paydalanıw múmkin. Nızamsız háreketlerdi súwretke alıw ushın kelisim shárt emes.
Videobaqlaw sistemaları haqqında eskertiwshi belgiler ornatılıwı shárt. Adamlardıń yarım yamasa tolıq kiyimsiz bolıwdı talap etetuǵın orınlarda (medicina xanası, juwınıw xanası, kiyim almastırıw xanaları hám basqa) videobaqlawdı ámelge asırıw qadaǵan etiledi.
Eger súwretten kelisim berilgen maqsetten basqa maqsette yamasa insannıń abırayı hám qádir-qımbatın kemsitetuǵın túrde paydalanılsa, kelisim biykar etiliwi múmkin.

N.Abduraimova, ÓzA