Nókis rayonı “Qutankól” MPJda Qutankól Mádeniyat sarayında “Ózbekstan – ulıwma úyimiz,” “Biz bir el hám bir Watanperzentlerimiz!” súreni astında, sonday-aq, 13-mart jaqın tuwısqanlarımızdıń biri bolǵan qazaq bawırlarımızdıń kórisiw merekesi múnásibeti menen mádeniy-aǵartıwshılıq ilaj ótkerildi.

Ilajǵa Din isleri boyınsha komitettiń rayonlıq bas qánigesi D.Tawekelov, Ruwxıylıq hám aǵartıwshılıq orayı N.Toimbetov, “Nuranıy” qorı J.Qaypov, hayal-qızlar úgit-násiyatlaw toparı S.Uzakova, Qaraqalpaqstan jazıwshılar awqamınıń aǵzası, shayır R.Otarbaev, mánawiy kómekshiler H.Berdieva, S.Aqnazarov hám nuranıylar, máhálle belsendileri qatnastı.
Ilajda oqıwshı jaslar hám máhálle turǵınları tárepinen tuwısqan milletlerdiń nama qosıqları, ayaq oyınları, úrp-ádetlerine baǵıshlanǵan kórgizbe hám saxnalıq kórinisler, milliy lipaslar, milliy ónermenshilik ónimleri hám milliy taǵamlar kórgizbeleri shólkemlestirildi.
Sonday-aq, ilajda shıǵıp sóylegenler milletleraralıq tatıwlıq hám óz-ara miyrim-shápáát ortalıǵın jáne de bekkemlew, túrli millet wákilleriniń tili, mádeniyatı, úrp-ádet hám dástúrlerin saqlaw, rawajlandırıw, mámleketimizde túrli millet wákilleri arasında óz-ara awızbirshilik, ósip kiyatırǵan áwladtı Watanǵa sadıqlıq, milliy qádiriyatlarǵa húrmet, túrli millet hám isenim wákillerine keńpeyillik ruwxında tárbiyalaw haqqında keń túsinikler berildi.
Ilaj sońında belsene qatnasqanlarǵa húrmet jarlıqları hám estelik sawǵaları tapsırıldı.

Qaraqalpaqstan xabar agentligi