Úsh mıń jıldan aslam tariyxqa iye bolǵan Nawrız – ózinde barlıq milliy úrp-ádet dástúrlerimiz benen qádiriyatlarımızdı jámlegeni menen xalqımız ushın oǵada qádirli esaplanadı. Bıyılǵı Nawrız bayramı elimizde “Qádiriyatlarıń máńgi bolsın, Nawrız!” súreni astında ulıwmaxalıqlıq seyil tárizinde kóterińkilik jaǵdayında belgilenbekte.

Usınday bayram ilajı Ózbekstan mámleketlik kórkem óner hám mádeniyat institutı Nókis filialında bolıp ótti.
Bayram ilajında filial direktorı Amanjol Ayapov shıǵıp sóylep, jıynalǵanlardı báhár áyyyamı – Nawrız bayramı menen qızǵın qutlıqladı hám sońǵı jılları elimizde Prezidentimizdiń basshılıǵında sociallıq-ekonomikalıq turmısımızdıń barlıq tarawlarında túpkilikli reformalar , sonıń ishinde bilimlendiriw tarawına da jaslarımızdıń oqıp bilim alıwı ushın barlıq múmkinshilikler jaratılıp atırǵanın atap ótti.
– Bul baǵdardaǵı jumıslardıń ámeliy kórinisi sıpatında 2024-2025-oqıw jılında jaslarımız ushın qosımsha kvotalardıń ajıratılıwı, sonday-aq, magistratura basqıshında oqıp atırǵan hayal-qızlarımızdıń shártnama tólemleri mámleketimiz tárepinen tólep berilmekte.-dedi filial direktorı Amanjol Ayapov.-Sonı ayrıqsha atap ótiwimiz tiyis, hár jılı bayram múnásibeti menen Tashkent hám Nókis qalalarında ótkeriletuǵın saltanatlı bayram ilajlarında filialımızdıń dóretiwshi jasları da xalqımızdıń belgili kórkem óner iyeleriniń qatarında óz koncert baǵdarlamaları belsene qatnasıp, ózleriniń dóretiwshilik qábiletlerin kórsetip kelmekte. Álbette, usınday bilimli, qábiletli jaslardıń jetilisip shıǵıwı olarǵa bilim bergen uzstazlardıń, qalaberse jámáátimiz ushın úlken maqtanısh esaplanadı.

Bayram ilajında hár qıylı milliy taǵamlar, ata-babalarımızdan miyras bolǵan úy buyımlarınıń kórgizbesi shólkemlestirildi.
Sonday-aq, ilajda milliy sport oyınları bolǵan arqan tartısıw, tas kóteriw hám qol gúresi sıyaqlı oyınlar ótkerilip, jeńimpazlar sıylıqlandı.
Bayram keshesinde «Tumar» ansambli hám student-jaslar tárepinen tayarlanǵan koncert baǵdarlaması jıynalǵanlar názerine usınıldı. Ashıq aspan astında ótkerilgen teatrlastırılǵan koncert baǵdarlaması bársheniń kewiline yosh hám joqarı keypiyat inam etti.
Ótkerilgen ilajǵa Qaraqalpaqstan Respublikası Mádeniyat ministri B. Temirbaev qatnastı.

Adilbay Orazov,
Qaraqalpaqstan xabar agentligi sholıwshısı.