Korruciyaǵa qarsı gúresiw boyınsha milliy keńes májilisinde mámleketimiz basshısı tájiriybe retinde bes shólkem –Desawlıqtı saqlaw, Qurılıs hám turaq jay kommunallıq xojalıǵı, Suw xojalıǵı ministrlikleri, «Ózbekneftgaz» hám «Ózsuwtámiynat» akcionerlik jámiyetleriniń komplaens qadaǵalawın Korrupciyaǵa qarsı gúresiw agentligine ótkeriw tapsırmasın berdi.

Hápte dawamında bul másele boyınsha Korrupciyaǵa qarsı gúresiw agentligi direktorınıń birinshi orınbasarı D. Rahimov Densawlıqtı saqlaw, Qurılıs hám turaq jay kommunallıq xojalıǵı, Suw xojalıǵı ministrlikleri, «Ózsuwtámiynat» basshısı menen ushırasıwlar ótkerdi.
Bul ilajlarda korrupciya hám mápler soqlıǵısıwı jaǵdaylarına imkan berip kiyatırǵan faktorlar, korrupciyanıń aldın alıwda jol qoyılıp atırǵan kemshilikler hám artta qalıwshılıqlar, tarawlarda adamlardı qıynap atırǵan mashqala hám tosqınlıqlar jáne bir márte sın kózqarastan kórip shıǵıldı.
Sonday-aq, sistemalardaǵı basshılar hám xızmetkerlerdiń juwapkershiligin arttırıw, insan faktorı hám byurokratiyanı jáne de qısqartıw, málimleme texnologiyaların keńnen engiziw boyınsha birgeliktegi máseleler hár tárepleme dodalandı.
Ushırasıwlar sońında Prezidentimiz tárepinen alǵa qoyılǵan baslama, wazıypa hám tapsırmalardıń orınlanıwın nátiyjeli támiyinlew boyınsha ámelge asırılatuǵın anıq ámeliy ilajlar belgilep alındı.

ÓzA