Sanlı texnologiyalar ministri Sherzod Shermatov Evropa Awqamınıń Ózbekstandaǵı elshisi Toyvo Klaar menen ushırastı.
Ushırasıwda Toyvo Klaar Ózbekstannıń kóp tarawlarda jedel rawajlanıw jolında erisip atırǵan xalıqtıń turmısın sezilerli dárejede jaqsılaǵan jetiskenlikleri, sonıń ishinde, sanlı texnologiyalar tarawında ámelge asırılıp atırǵan jumıslardı joqarı bahaladı.
Óz gezeginde, ministr Sh.Shermatov ministrliktiń tiykarǵı maqsetlerinen biri jas áwladtı tayar jumıs orınları menen támiyinlew, bul arqalı olardı elimizde bolıp, joqarı miynet haqı alıwı ushın imkaniyat jaratıw ekenin atap ótti.
Sonday-aq, ushırasıwda Ózbekstannıń teńizge shıǵıw imkaniyatlarınıń sheklengeni sebepli ministrlik MKT tarawın jedel rawajlandırıp atırǵanı, bul bolsa IT-xızmetler eksportı kórsetkishlerin jedel arttırıwǵa xızmet etip atırǵanı atap ótildi.
Tarawdı rawajlandırıw ushın ámelge asırılıp atırǵan baǵdarlamalar, sonıń ishinde, «One Million Uzbek Coders» joybarı haqqında maǵlıwmat berildi.
Ministr Sh.Shermatov Evropa bazarınıń ózine tán ózgesheliklerinen kelip shıǵıp, Evropa mámleketleri menen birge islesiwdi keńeytiw zárúr ekenligin atap ótti.
Bunnan tısqarı, ushırasıwda telekommunikaciya baǵdarında birge islesiw perspektivaları, sonıń ishinde alıs aymaqlardı zamanagóy jasalma jer joldası baylanıs sisteması járdeminde joqarı tezliktegi internet penen támiyinlew boyınsha birgelikte joybarlardı ámelge asırıw máseleleri dodalandı.
Sońında tárepler óz-ara paydalı birge islesiw hám jaqın keleshekte birgeliktegi joybarlardı tabıslı ámelge asırıwǵa úmit bildirdi.
R.Rahmonova,
ÓzA