Házirgi waqıtta elimizde «Jasıl mákan» ulıwma milliy joybarı sheńberinde kóklemzarlastırıw hám abadanlastırıw jumısları ámelge asırılmaqta. Miyweli hám sayamanlı terek nállerin egiw, tereklerdiń shaqaların qırqıw jumısların agrotexnikalıq qádelerge say júrgiziwde tájiriybeli baǵmanlardıń tutqan ornı ayrıqsha.

Qaraózek rayonı Mádeniyat awıl puqaralar jıyını turǵını Ádilbay aǵa Qurbanbaev ta usınday tájiriybeli baǵmanlardıń biri. Pensiyaǵa shekem awılxojalıǵında jemisli miynet etken ol, 2018-jılı 34 sotıx maydanda baǵ jaratıp, onda 160 túpten aslam miyweli náller egip tárbiyalap kiyatır.
-Házir qıytaq jerimizde alma, erik, shabdal, ǵoza hám 2,5 mıń túpten aslam aq tereklerdi tárbiyalap atırmız,-deydi Ádilbay aǵa.
Jaqında Ádilbay aǵa Qurbanbaevtıń qıytaq jerinde aymaqtaǵı awıl jası úlkenleri menen kóshe biyleriniń qatnasıwında miyweli baǵ tárbiyası boyınsha seminar shólkemlestirildi.
Onda aymaqtıń tájiriybeli baǵmanları miywe hám sayamanlı terek nállerin egiw, siyrekletiw, olardı hár qıylı zıyankeslerden qorǵaw, tereklerdiń shaqaların qırqıw boyınsha óz-ara tájiriybe almastı.
Seminarǵa Qaraqalpaqstan Respublikası Joqarǵı Keńesiniń komitet baslıǵı Sh. Ótemisov qatnastı hám diyqanlarımızdıń alda turǵan wazıypaları boyınsha shıǵıp sóyledi.

Adilbay Orazov,
Qaraqalpaqstan xabar agentligi sholıwshısı.